بارہ بنکی: 1076 کی تشہیر پر سماج وادی پارٹی نے حکومت پر نکتہ چینی کی

ریاست اترپردیش کے ضلع بارہ بنکی میں شائد ہی ایسا کوئی سرکاری دفتر ہوگا جہاں 1076 ہیلپ لائن کی تشہیر والی سائن بورڈز نہ لگے ہوں۔ سائن بورڈ پر وزیراعلیٰ یوگی آدتیہ ناتھ کی تصویر کے ساتھ لکھا گیا ہے کہ اگر ان کا مسئلہ اس دفتر سے حل نہیں ہوا ہے تو 1076 کے ذریعہ وہ وزیراعلیٰ یوگی آدتیہ ناتھ کے دفتر میں اپنی شکایت درج کرا سکتے ہیں۔ دوسری جانب سماج وادی پارٹی نے 1076 کی تشہیر پر سوال کھڑے کئے ہیں۔

واضح ہو کہ 1076 ہیلپ لائن کا آغاز 2019 میں ہوا تھا۔ اس پر ضلع انتظامیہ کے ذریعہ عوامی مسائل کا حل نہ ہونے کی صورت میں شکایت کی جا سکتی ہے۔

عوام کو 1076 ہیلپ لائن کے تئیں بیدار کرنے کے مقصد سے اس کی ہورڈنگس تمام دفاتر اور تھانوں میں ایک نہیں بلکہ متعدد جگہوں پر لگائی گئی ہیں۔

1076 ہیلپ لائن کے اس قدر وسیع پیمانے پر تشہیر نے حزب اختلاف کی سماج وادی پارٹی کو حکومت پر نکتہ چینی کا موقع دے دیا ہے۔

سماج وادی پارٹی کے بارہ بنکی نشست سے رکن اسمبلی دھرمراج یادو عرف سریش یادو نے اسے آئندہ اسمبلی انتخابات کے پیش نظر تشہیر قرار دیا ہے۔

ان کا الزام ہے کہ یہ تمام قواعد ڈھکوسلہ ہے اور حکومت کی کسی بھی اسکیم کا اثر عوام تک نہیں پہنچ سکا ہے۔