یادو نے صدر کی تقریر پر راجیہ سبھا میں شکریہ کی تحریک پر بحث میں حصہ لیتے ہوئے کہا کہ یہ حکومت ’سب کا ساتھ، سب کا وِکاس اور سب کا وِشواس‘ کی بات کرتی ہے, لیکن اس کے رہنماؤں کو ہی بھروسہ نہیں ہے۔
انہوں نے سی اےاے کو فوراً ملتوی کرنے اور پڑوسی ممالک سے ستم رسیدہ آنے والے تمام مذاہب کے ماننے والوں کو شہریت دینے کا مطالبہ کرتے ہوئے کہا کہ میانمار کے روہنگیا کو شہریت ملنی چاہیے۔ وہ بھی مذہب کی بنیاد پر ستائے گئے ہیں۔
ایس پی کے رہنما نے حکومت سے فیاض طبع بننے کی اپیل کرتے ہوئے کہا کہ کچھ سرپھرے لوگوں کی وجہ سے پوری قوم کو ناقابل اعتبار نہیں سمجھا جاسکتا ہے۔
انہوں نے بھارتیہ جنتا پارٹی (بی جےپی) کو عام انتخابات میں ملنے والی عوامی حمایت پر طنز کرتے ہوئے کہا کہ یہ ملک کو برباد کرنے کے لیے ملی ہے۔ ملک کے ہر گاؤں میں دو طرح کا ہندوستان بننے کی بات کہتے ہوئے انہوں نے کہا کہ خارجہ پالیسی ایسی ہونی چاہیے کہ جس سے آپ کے پڑوسیوں کے ساتھ رشتے اچھے ہوں لیکن اس حکومت کے رشتے کسی بھی پڑوسی ملک کے ساتھ ٹھیک نہیں ہیں۔
پروفیسر یادو نے جموں وکشمیر سے دفعہ 370 ہٹائے جانے کا ذکر کیے بغیر کہا کہ اگر کشمیر میں سب کچھ ٹھیک ہے تو نظر بند کیے گئے تینوں سابق وزرائے اعلیٰ کو فوراً اس سے آزاد کیا جانا چاہیے۔
انہوں نے کہا کہ حکومت نے کسانوں کی آمدنی دوگنی کرنے کے مقصد سے کم از کم امدادی قیمت میں اضافہ تو کیا ہے لیکن کسانوں کے پیداوار کو خریدنے والا کوئی نہیں مل رہا ہے اور انھیں اونے پونے دام پر اپنے پیداوار کو بیچنے پر مجبور ہونا پڑ رہا ہے۔
ملک میں بد عنوانی ختم کیے جانے پر طنز کرتے ہوئے انہوں نے کہا کہ نیشنل کمپنی لاء ٹریبونل (این سی ایل ٹی)میں بڑے پیمانے پر بدعنوانی ہو رہی ہے جو ہندوستان کا سب سے بڑی بدعنوانی ہوگی۔
انہوں نے کہا کہ ایک ہزار کروڑ روپیے کے قرض کو 94 فیصد تک کم کرکے پھر سے اسی کمپنی کو دیا جا رہا ہے۔
صدر کی تقریر میں جموں و کشمیر میں دفعہ 370 کو دو تہائی اکثریت سے پاس کیے جانے کے ذکر پر انہوں نے کہا کہ اس ایوان میں یہ دو تہائی اکثریت سے پاس نہیں ہوا ہے اور یہ غلط ہے۔ اس پر صدر کو چاہیے کہ وہ کابینہ کو وارننگ دیں۔
