کورونا وبا کے مثبت مریضوں کی تعداد کم ہونے پر اترپردیش کے کئی اضلاع میں لاک ڈاؤن میں راحت دی گئی ہے جس کے تحت مظفر نگر میں لاک ڈاؤن میں رعایت دی گئی ہے۔
ضلع انتظامیہ نے کورونا کی نئی گائیڈ لائن کے چلتے مظفر نگر سے کورونا کرفیو ختم کرتے ہوئے پیر کی صبح سے مظفر نگر کے سبھی بازار شرائط کے مطابق کھول دیئے جائیں گے۔ یہ بازار صبح 7 بجے سے شام 7 بجے تک کُھلیں گے۔ اس دوران دکانداروں اور تاجروں کو کورونا گائیڈ لائن پر عمل کرنے کی ہدایت دی گئی ہے۔
شام 7 بجے کے بعد سے رات کا کرفیو پہلے کی طرح رہے گا اس کے علاوہ سنیچر اور اتوار کے روز مکمل لاک ڈاؤن نافذ رہے گا۔
اس کے علاوہ مذہبی مقامات پر 5 سے زائد عقیدت مندوں کے اکٹھا ہونے پر پابندی ہوگی جبکہ شادیوں کی تقریبات کے لیے پچیس افراد کی شرکت کو منظوری دی گئی ہے اور 20 افراد کو آخری رسومات کے لیے اجازت دی گئی ہے۔
اس کے علاوہ ہوٹلز، ریسٹورنٹس، سنیما گھر، اسپورٹس اسٹیڈیم اور گارڈنس مکمل طور پر بند رہیں گے۔ اسکول کالج کوچنگ سینٹر بھی مکمل طور پر بند ہوں گے۔ تمام صنعتی ادارے ان شرائط کی بنیاد پر کھولے جائیں گے جن میں کارکنان کی تعداد 20 سے زائد نہیں ہوگی جبکہ ریلوے اور روڈ ویز بس چلتی رہیں گی اور گورنمنٹ انسٹی ٹیوشن بینک، ہسپتال اور پرائیویٹ کلینک بھی کُھلے رہیں گے۔
