رامپور کے ڈی ایم نے آنجنئے کمار سنگھ نے آج ضلع میں دھان خرید کے لئے بنائے گئے مراکز کا اچانک معائنہ کیا۔ وہ وہاں فلمی انداز میں ایک کاشتکار بن کر گئے۔ سرکاری گاڑیوں اور اپنے عملے کو آدھا کلو میٹر دور روک کر جب وہ دھان خرید سینٹر پر پہنچے تو وہاں انہوں نے زبردست بے ضابطگیاں پائیں۔ جس پر ضلع انتظامیہ نے لاپرواہ افسران و کارکنان کے خلاف سخت کارروائی کے احکامات دیے۔
سر پر رومال باندھ کر خفیہ طریقہ سے کاشتکار بن کر پہنچے ڈی ایم آنجنئے کمار سنگھ کو سینٹر انچارج پہچان نہیں سکے۔ کچھ وقفہ کے بعد ایس ڈی ایم بلاسپور اور دیگر افسران کے پہنچنے پر منڈی میں ضلع مجسٹریٹ کے موجود ہونے کی اطلاع پر منڈی احاطہ میں افراتفری مچ گئی۔
اس بعد ضلع مجسٹریٹ نے باری باری سے تمام سینٹر انچارجوں کی کلاس لگائی۔ بلاسپور واقع این سی سی ایف خرید سینٹر پر زبردست بے ضابطگیاں پائی جانے پر ڈی ایم نے سینٹر انچارج کے خلاف لاپرواہی برتنے کے سبب ایف آئی آر درج کرانے کے لیے احکامات دیے۔
انہوں نے کسانوں کا دھان نہ خریدے جانے سے متعلق معلوم کیا اور کہا کہ اگر دھان میں نمی ہے تو اسے سکھانے کے لیے کسانوں کو مناسب جگہ مہیا کرائیں تاکہ کسانوں کو دھان واپس لے جانے کے بجائے منڈی احاطہ میں سکھانے کی سہولت مل سکے۔
مزید پڑھیں:
کمپیوٹر سینٹر پر دھوکہ دہی کا الزام
انہوں نے کہا کہ آئندہ سینٹر انچارج اس بات کا خاص خیال رکھیں کہ کسی بھی حالت میں کسانوں کو غیر ضروری طور سے کوئی دشواری نہیں ہونی چاہیے۔
