ریاست اتر پردیش کے ضلع بارہ بنکی میں پیر کو رائین یکجہتی اجلاس کا انعقاد عمل میں آیا۔
اجلاس میں ضلع کے رائین برادری کے نامور شخصیات نے شرکت کی۔ اس موقع پر رائین برادری کی ترقی اور انہیں سیاسی حصہ داری دینے کی قرارداد منظور کی گئی۔ ساتھ ہی بارہ بنکی کی اسمبلی نشست کے لئے رائین برادری کے ذیشان اسلم کو سماج وادی پارٹی سے امیدواری کا دعویٰ کیا گیا۔
رائین یکجہتی اجلاس کی صدارت مذکورہ طبقے کے رکن وسیم رائینی نے کی۔ انہوں نے بتایا کہ اس اجلاس کا اہم مقصد رائین برادری کو اس کی آبادی کے مطابق سیاسی حصہ داری دلانا ہے. ان کا مطالبہ ہے سماج وادی پارٹی، بی ایس پی اور کانگریس میں انہیں مناسب حصہ داری ملنی چاہیے۔
انہوں نے بارہ بنکی کی اسمبلی نشست سے سماجوادی پارٹی سے اپنی برادری کے ذیشان اسلم کی امیدواری کی حمایت کی۔ وہیں ذیشان اسلم نے اپنی امیدواری کا دعویٰ کرتے کہا کہ اب بارہ بنکی کو نوجوان رکن اسمبلی کی ضرورت ہے۔ عوام کا بھی یہی مطالبہ ہے اسلئے وہ اس حلقے سے امیدوار بننا چاہتے ہیں۔ انہوں نے کہا کہ اگر ایس پی اپنا امیدوار نہیں بناتی ہے تو وہ پارٹی کے فیصلے کا احترام کرتے ہوئے دوسرے امیدوار کی مدد کریں گے۔
