اترپردیش کے ضلع مظفر نگر میں کلکٹریٹ کے احاطے میں آج مظاہروں کا دن رہا۔ اتوارکےروز لکھیم پور میں ہوئے واقعے میں کسانوں کی ہلاکتوں کو لے کر انصاف دلانے اور معاوضے کو لے کر بھارتیہ کسان یونین کے کارکنان اور عہدے داروں نے مظفر نگر ضلع کلیکٹریٹ میں سینکڑوں کی تعداد میں پہنچ کر زبردست احتجاجی مظاہرہ کیا۔
ان کے ساتھ ساتھ سماج وادی پارٹی، راشٹریا لوک دل، عام آدمی پارٹی نے بھی ضلع کلکٹریٹ میں پہنچ کر زبردست احتجاجی مظاہرہ کیا۔ ان سبھی نے مشترکہ بیان میں کہا کہ 'ہمارا احتجاج تب تک جاری رہے گا جب تک کہ لکھیم پور میں شہید ہوئے کسانوں کو انصاف نہیں مل جاتا'
یہ بھی پڑھیں:لکھیم پور تشدد: متاثرین کے اہلِ خانہ کو معاوضہ اور سرکاری نوکری کا اعلان
انھوں نے کہا اس واقعے میں ملوث ملزمان کے خلاف سخت ترین کاروائی نہیں ہو جاتی اور شہید ہوئے کسانوں کے اہل خانہ کو حکومت کے ذریعے ایک کروڑ روپے کی معاوضے کی رقم اور ان کی فیملی میں سے ایک ایک ممبر کو سرکاری ملازمت نہیں مل جاتی جب تک اسی طرح سے احتجاجی مظاہرہ کرتے رہیں گے۔
مظاہروں کے مدنظر پولیس اور ضلع انتظامیہ نے ضلع میں زبردست بندوبست کر رکھے ہیں۔ ضلع میں پولیس اور انتظامیہ پوری طرح سے الرٹ ہے۔
