اردو ٹیچرز ایسو سی ایشن علی گڑھ اور شمس مسلم ایجوکیشنل اینڈ ویلفیئر سوسائٹی کے زیر اہتمام علی گڑھ مسلم یونیورسٹی (اے ایم یو) کی صد سالہ تقریبات کے موقع پر یونیورسٹی کے شعبہ قانون میں ایک تقریب کا انعقاد کیا گیا۔
اردو ٹیچرز ایسوسی ایشن علی گڑھ کے سرپرست کنور نسیم شاہد اور ڈین فیکلٹی آف لاء پروفیسر شکیل صمدانی نے اپنے دست مبارک سے یونیورسٹی کے ہونہار طلبا و طالبات کو کھیل کے میدان میں نمایاں کارگردگی کا مظاہرہ کرنے پر اعزازی اسناد اور تحائف دے کر ان کی حوصلہ افزائی کی۔
اردو ٹیچر ایسوسی ایشن کے سرپرست کنور نسیم شاہد نے کہا کہ یہ فخر کی بات ہے کہ تعلیم کے ساتھ ساتھ ہماری بچیاں کھیل کے میدان میں بھی بھارت کے مختلف صوبوں میں نام روشن کر رہی ہیں۔ آج ہم نے جن بچیوں کو انعامات سے نوازا اس میں ابیر رضوان (ہاکی اور ایتھلیٹ کھلاڑی)، ثانیہ ندیم، طلحہ ندیم، عائشہ مظہر، صبیہ ناز (نیشنل ہاکی کھلاڑی) کو اعزازی اسناد اور تحفے دے کر ان کی حوصلہ افزائی کی ہے تاکہ مستقبل میں یہ بچیاں مزید بہترین کارکردگی کر سکیں اس کے علاوہ تعلیمی میدان میں ہم نے ہما ظہیر، ادیبہ رحمن اور یحیٰی کو بھی اعزاز سے نوازا۔
اس موقع پر پروفیسر شکیل صمدانی نے کہا کہ اردو ٹیچر ایسوسی ایشن سماجی اور ملی کاموں میں ہمیشہ حصہ لیتی ہے انہوں نے ٹیم کے اراکین کو مبارکباد پیش کی اور ساتھ ہی طلبہ سے کہا کہ آپ قابل مبارکباد ہیں کہ اپنی تعلیم کے ساتھ ساتھ کھیل کے میدان میں بھی بہترین کارکردگی انجام دے رہے ہیں۔
پروفیسر شکیل صمدانی نے مزید کہا کہ ہمارے پیارے نبی صلی اللہ علیہ وسلم نے بھی تعلیم کے ساتھ ساتھ کھیل کو فروغ دیا تھا اور بانی یونیورسٹی سرسید احمد خان نے کھیل کود کے لیے باقاعدہ علیحدہ سے انتظامات کیے تھے۔
انہوں نے کہا کہ مجھے خوشی ہے کہ آج اس درسگاہ کے ہونہار طلبہ بھارت میں ہی نہیں بلکہ پوری دنیا میں مختلف مقامات پر یونیورسٹی کا نام روشن کر رہے ہیں انہوں نے کہا کہ مجھے فخر ہے کہ اس تنظیم نے مجھے اس قابل سمجھا کہ ہونہار طلبہ کو اپنے ہاتھوں سے اعزاز دوں۔
اس موقع پر پروفیسر شکیل صمدانی، نسیم شاہد، کلیم تیاگی (صدر اردو ڈیولپمنٹ آرگنائزیشن)، حاجی افضال احمد، محترمہ شبلی اسماء اور مرتضی کے علاوہ کئی تنظیموں کے نمائندے موجود رہے۔
