ریاست اترپردیش میں کانگریس جنرل سکریٹری پرینکا گاندھی نے اترپردیش میں قرض کے بوجھ سے دب کر خود کشی کرنے والے کسان کے مسئلے پر ریاست کی یوگی آدتیہ ناتھ حکومت پر زبردست حملہ کرتے ہوئے کہا کہ ریاست میں کسان خودکشی کررہے ہیں اور حکومت امیروں کے پیسے معاف کرنے میں مصروف ہے۔
پرینکا گاندھی نے قرض نہ ادا کرنے کی وجہ سے ایک کسان کی خودکشی کرنے کی میڈیا رپورٹز کا ذکر کرتے ہوئے ٹوئٹ کیا کہ 'ایک طرف بھارتيہ جنتا پارٹی حکومت نے اپنے امیر کارپوریٹ ساتھیوں کا 76 ہزار کروڑ روپے کا قرض ایک بار میں ہی معاف کردیا، اور دوسری جانب اترپردیش کے کسان 35 ہزار روپے کا قرض چکا نہ پانے کے سبب خود کشی کرنے پر مجبور ہیں'۔
کانگریس جنرل سکریٹری نے کہا کہ 'یہ ناانصافی ہے،کسان قرض کے بوجھ میں دبے ہوئے ہیں اور حکومت نے ان کی طرف سے آنکھیں بند کرلی ہے'۔
