صدر جمہوریہ رام ناتھ کووند دو ماہ کے اندر ایک بار پھر چار روزہ دورے پر 26 اگست کو لکھنؤ آرہے ہیں۔ صدر جمہوریہ اپنے اس سفر کے دوران دو دن لکھنؤ میں دیگر پروگراموں میں شرکت کریں گے۔ اس کے بعد 28 اگست کو گورکھپور میں پروگرام میں حصہ لینے پہنچیں گے۔ اس کے بعد 29 اگست کو صدر جمہوریہ پریسیڈینشیل ٹرین سے لکھنؤ سے ایودھیا تک کا سفر طے کریں گے۔
صدر جمہوریہ رام ناتھ کووند کا دورہ پہلے تین دن کا تھا۔ 27 اگست سے لے کر 29 اگست تک سفر کرنا تھا، لیکن پروگرام میں تبدیلی کرتے ہوئے اب 26 سے لے کر 29 اگست تک صدر جمہوریہ اتر پردیش دورے پر ہوں گے۔ صدر جمہوریہ 26 اگست کو بھیم راؤ امبیڈکر یونیورسٹی کے کانوکیشن میں شرکت کریں گے۔ وہیں 27 اگست کو لکھنؤ میں سینک اسکول کی ہیرک جینتی پر پوسٹل اسٹامپ کا اجرا کریں گے۔ اس کے ساتھ ہی 1000 افراد کی گنجائش والے اسکول کے آڈیٹوریم کا بھی اجرا کریں گے۔ اس کے علاوہ وہ منوج پانڈے سینک اسکول میں طلبہ کے لیے ہاسٹل کا بھی سنگ بنیاد رکھیں گے۔ سینک اسکول کے بانی سابق وزیر اعلیٰ سمپورنانند کے ایک بڑے مجسمے کی نقاب کشائی بھی کریں گے۔
یہ بھی پڑھیں: یوم آزادی کے پیش نظر صدرجمہوریہ رام ناتھ کووند کا خطاب
رام ناتھ کووند 28 اگست کو گورکھپور جائیں گے اور وہاں آیوش یونیورسٹی کا سنگ بنیاد رکھیں گے۔ اس کے بعد گورکھ ناتھ یونیورسٹی میں ہسپتال عمارت کا افتتاح بھی کریں گے۔ 29 اگست کو صدر کووند صبح نو بجے لکھنؤ کے چار باغ سے پریسیڈینشیل ٹرین سے ایودھیا جائیں گے۔ تقریباً 11:30 بجے ایودھیا پہنچیں گے اور رام للا کے درشن کریں گے۔ اسی دن صدر جمہوریہ لکھنؤ واپس آجائیں گے اور راج بھون میں رات کو رکیں گے۔ اگلے دن 30 اگست کو صبح صدر جمہوریہ دہلی کے لیے روانہ ہوجائیں گے۔
