اترپردیش کے ضلع گوتم بودھ نگر میں در پیش عوام کے مسائل کو اٹھانے کے لئے کانگریس پارٹی کی موجودگی انتہائی کم نظر آتی ہے۔ تاہم عوامی مسائل کے حل کے لیے کانگریس پارٹی کی جانب سے ضلع میں مختلف سیل کے علاوہ 9 افراد کو پی سی سی اور دو افراد کو AICC کا ممبر بنایا گیا ہے۔
لیکن مظاہرے اور دھرنے کے دوران چند بڑے رہنماؤں کے علاوہ پی سی سی اور اے آئی سی سی کا کوئی ممبر نظر نہیں آتا ہے، جس کو دیکھتے ہوئے کانگریس کے غیر فعال اور موقع پرست رہنماؤں کی فہرست تیار کی جا رہی ہے جو ریاستی صدر اجے کمار للو اور قومی جنرل سکریٹری پرینکا گاندھی کو جلد بھیجی جائے گی۔
نوئیڈا میں عوام کی مسائل کو اٹھانے کے لیے کانگریس کمیٹی نوئیڈا مہانگر کی طرف سے 32 رکنی کمیٹی تشکیل دی گئی ہے، اس کے علاوہ کانگریس سیوادل، یوتھ کانگریس، ویمن سیل، این ایس یو آئی، پسماندہ طبقہ، سوشل میڈیا، کسان کانگریس، ایس سی، ایس ٹی شعبہ، اقلیتی سیل سمیت دیگر سیل اور 9 بلاک سطح پر کمیٹی تشکیل دی گئی ہے۔
اس کے باوجود بھی مظاہرے میں کانگریسیوں کی تعداد بہت کم ہی دکھائی دیتی ہے، تنظیم کے چند رہنماؤں تک معاملہ محدود ہوجاتا ہے، جبکہ کارکنان غائب ہی ہوتے ہیں۔ مختلف سیل میں عہدہ پر بیٹھے رہنما پارٹی کے پروگرام اور مظاہرے کو زیادہ توجہ نہیں دیتے۔ یہی وجہ ہے کہ کسی بھی مسئلہ پر تنظیم کی موجودگی نہیں کے برابر نظر آتی ہے۔
اس سلسلے میں مہانگر کمیٹی کے صدر شہاب الدین غیر فعال لوگوں کی کارکردگی سے مطمئن نہیں ہیں اور اس کی فہرست تیار کررہے ہیں۔
