اترپردیش کے ضلع گوتم بودھ نگر نوئیڈا میں پُرامن اور آزادانہ انتخابات Peaceful And Free Elections کے لئے ضلع انتظامیہ اور پولیس کی جانب سے مؤثر اقدامات کئے جارہے ہیں۔
ضلع پولیس کمشنر آلوک سنگھ اور ضلع مجسٹریٹ سہاس ایل وائی نے ضلع کے دادری اسمبلی حلقہ میں اگرسین انٹر کالج، مہر بھوج انٹر کالج، مہر بھوج ڈگری کالج اور گوڑ انٹرنیشنل اسکول میں پولنگ بوتھس کا مشترکہ معائنہ کیا۔
اس دوران پولنگ اسٹیشنز پر سکیورٹی انتظامات کو چیک کیا گیا اور متعلقہ اے آر اوز کو ہدایات دی گئیں۔
پولیس کمشنر نے الیکشن کمیشن کی جانب سے جاری کردہ رہنما خطوط پر عمل کرنے، بوتھ پر ایک کمرے کا فرق رکھنے، داخلی اور خارجی راستے الگ الگ بنانے اور کووڈ ہیلپ ڈیسک قائم کرنے کی ہدایت دی۔
انہوں نے پولیس افسران سے یہ بھی کہا کہ وہ حساس علاقوں تک پہنچیں، شہریوں اور علاقائی لوگوں سے بات چیت کریں تاکہ ان میں اعتماد پیدا ہو۔
اس دوران ڈی سی پی گریٹر نوئیڈا، ڈی سی پی سینٹرل نوئیڈا، اسٹاف آفیسر، اے ڈی سی پی سینٹرل نوئیڈا، اے ڈی سی پی گریٹر نوئیڈا اور متعلقہ اے سی پی موجود تھے۔
واضح رہے کہ ضلع میں پُرامن اور آزادانہ انتخابات کے انعقاد کے لیے بودھ سے پیرا ملٹری فورس کی جانب سے مقامی پولیس کے تعاون سے مختلف تھانوں کے علاقوں میں پیدل مارچ کیا جائے گا۔
اس کے ساتھ ہی پولس کمشنر نے متعلقہ تھانہ انچارجس کو ہدایت دی ہے کہ وہ ایسے افراد کی نشاندہی کریں جو لوگوں کو ڈرانے اور دھمکانے کا کام کرسکتے ہیں۔ ان کے خلاف احتیاطی کارروائی کرنے کو کہا گیا ہے۔
