یوپی مدرسہ تعلیمی بورڈ کے سبھی مدارس میں آن لائن کلاسز کی ساری تیاریاں مکمل کر لی گئی ہیں۔ دوسرے بورڈوں کی طرز پر مدرسہ طلبا بھی آن لائن تعلیم حاصل کریں گے جس سے پڑھائی کا نقصان نہ ہوگا۔
وبائی امراض کی وجہ سے گزشتہ سال آن لائن پڑھائی شروع ہوئی تھی اور امسال بھی کورونا کے خطرات کو دیکھتے ہوئے مدرسہ بورڈ کے رجسٹرار نے سبھی مدارس میں آن لائن کلاسز شروع کرنے کا فرمان جاری کیا ہے۔
ای ٹی وی بھارت سے بات چیت کے دوران قاری امتیاز احمد، مینیجر ،مدرسہ جامعہ عربیہ مخزن العلوم لکھنؤ نے بتایا کہ گزشتہ سال بھی آن لائن کلاس ہوئی تھی اور اس بار بھی آن لائن کلاسز شروع کرنے کی ہدایت جاری کر دی گئی ہے۔ یہ ہمارے لئے یا دوسرے مدارس کے لیے کوئی نئی بات نہیں ہے۔ ہماری تیاریاں مکمل ہیں اور اب ہمیں اس کا تجربہ بھی ہے۔
قابل ذکر ہے کہ مدرسہ بورڈ نے بھلے ہی آن لائن کلاسز شروع کرنے کا اعلان کر دیا ہو لیکن مدرسہ طلبا کے لئے آن لائن کلاس بڑا مسئلہ بنا ہوا ہے۔ اس کی بنیادی وجہ یہ ہے کہ اکثریت کے پاس اسمارٹ موبائل فون نہیں ہے۔
