پولس تصادم میں دو بدمعاش زخمی اور گرفتار

نوئیڈا میں پولیس اور شرپسندوں کے درمیان تصادم میں دو بدمعاش زخمی ہو گئے۔ دونوں بدمعاش کچھ دن پہلے پیرول پر جیل سے باہر آئے تھے۔

اترپردیش کے ضلع نوئیڈا میں پولیس اور شرپسندوں کے درمیان سیکٹر 15 کے قریب تصادم میں دو بدمعاش زخمی ہو گئے جنہیں علاج کے لئے ضلع ہسپتال میں داخل کرایا گیا ہے۔ دونوں بدمعاش کچھ دن پہلے پیرول پر جیل سے باہر آئے تھے۔

ایڈیشنل ڈپٹی کمشنر پولیس رن وجے سنگھ نے بتایا کہ پولیس اسٹیشن سیکٹر 20 دیر رات سیکٹر 15 میں نالے کے قریب چیکنگ کر رہی تھی۔ تبھی موٹرسائیکل پر دونوں شرپسند نمودار ہوئے۔ جب پولیس نے انہیں روکنے کا اشارہ کیا تو شرپسندوں نے پولیس اہلکاروں پر فائرنگ کردی۔

انہوں نے بتایا کہ جوابی کارروائی میں پرمود عرف راجو عرف کرشنا اور آکاش عرف داڑھی کو گولی لگی۔ ان کا کہنا تھا کہ دونوں کو تشویشناک حالت میں نوئیڈا کے ضلع ہسپتال میں داخل کرایا گیا ہے۔

ان کے پاس سے ایک لائسنس دار سنگل بیرل گن، 24 زندہ کارتوس، دو دیسی طمنچے اور ایک موٹرسائیکل برآمد ہوئی ہے۔

ایڈیشنل ڈپٹی کمشنر نے بتایا کہ ان شرپسند عناصر میں سے پرمود پر ڈکیتی، چوری اور اقدام قتل کے 15 مقدمات درج ہیں جبکہ آکاش پر 9 مقدمات درج ہیں۔

انہوں نے بتایا کہ کووڈ-19 کی وجہ سے اتر پردیش حکومت نے کچھ قیدیوں کو پیرول پر رہا کیا ہے۔ اس کے تحت 28 مئی کو پرمود اور آکاش 2 جون کو گریٹر نوئیڈا کی لکسور جیل سے پیرول پر آئے تھے۔