اتر پردیش ایس ٹی ایف اور نوئیڈا پولیس کی مشترکہ کاروائی میں مارے گئے دو لاکھ روپے کا انعامی بدمعاش اجے عرف کالیا کی لاش لینے کے لیے اس کا کوئی بھی رشتہ دار نہیں آیا۔
پولیس نے کل اس کی لاش کا پوسٹ مارٹم کروایا جس کے بعد اس کے دہلی اور ریواڑی واقع رہائش پر اطلاعات بھیجی تاکہ اس کے لواحقین لاش کو گھر لے جا سکیں۔
ایڈیشنل پولیس کمشنر رن وجے سنگھ کے مطابق پوسٹ مارٹم کے بعد پولیس نے اس کی لاش کو فریزر میں رکھوا دیا ہے۔
ایڈیشنل پولیس کمشنر کے مطابق نوئیڈا پولیس 72 گھنٹے تک اس کے لواحقین کا انتظار کرے گی۔ اس درمیان اس کے گھر کا کوئی فرد نہیں آتا ہے تو پولیس اپنی نگرانی میں اس کی آخری رسومات کرے گی۔
واضح رہے کہ بدنام زمانہ لُٹیرا اور خوف کی علامت بن چکا اجے کالیا کل سیکٹر 20 تھانہ کے تحت سیکٹر 15 میں انکاؤنٹر کے دوران مارا گیا ہے۔
پولیس کے ساتھ تصادم کے دوران اس کا ایک ساتھی فرار ہونے میں کامیاب رہا۔ پولیس کے مطابق اجے کالیا کے نام سے مشہور یہ ملزم کسی واردات کو انجام دینے شہر میں آیا تھا۔
یہ بھی پڑھیں: نوئیڈا: پولیس اور شرپسندوں کے درمیان تصادم، دو گرفتار
اتر پردیش ایس ٹی ایف کو اس کے بارے میں پتہ چل گیا۔ ایس ٹی ایف نے پہلے محاصرہ کر کے اجے کالیا کو گرفتار کرنے کی کوشش کی لیکن ملزم نے پولیس پر فائرنگ کردی اور جوابی فائرنگ میں ہلاک ہوگیا۔
اجے کالیا شاہراہوں پر لوٹ مار، ڈکیتی اور جنسی زیادتی میں ملوث خانہ بدوش گروہ کا سرغنہ تھا۔ اس کے خلاف درجنوں مقدمات درج تھے۔
