کورونا وائرس سے تحفظ کے لیے ویکسین کی دوسری خوراک حاصل کرنے والوں کو اب قطار میں کھڑے ہونے کی ضرورت نہیں ہے کیوں کہ انتظامیہ نے ہفتے میں ایک دن یعنی سنیچر کا دن سیکنڈ ڈوز کے لیے مختص کر دیا ہے۔
اتر پردیش کے ضلع گوتم بودھ نگر میں نوئیڈا کے چیف میڈیکل آفیسر ڈاکٹر سنیل کمار شرما نے یہ معلومات دی۔
میڈیکل اینڈ ہلیتھ کے ایڈیشنل چیف سکریٹری امِت موہن پرساد کی ہدایات کا حوالہ دیتے ہوئے سی ایم او نے کہا کہ کورونا سے بچنے کے لیے ویکسین کی دو خوراکیں لینا ضروری ہے اس کے بعد ہی قوت مدافعت پیدا ہوتی ہے۔ لہٰذا حکومت کی توجہ اس بات پر ہے کہ زیادہ سے زیادہ لوگ جلد از جلد دوسری خوراک حاصل کریں۔
انہوں نے کہا کہ اس کے پیش نظر یہ فیصلہ کیا گیا ہے کہ ہفتہ(سنیچر) کو صرف اُن لوگوں کو ویکسین دی جائے جو دوسری خوراک کے اہل ہوں۔
یہاں صبح 9 بجے سے صبح 11 بجے تک اُن لوگوں کو دوسرا ڈوز دیا جائے گا جو سلاٹ بُک کروا کر آئیں گے۔ اس کے بعد ان لوگوں کو ویکسین لگائے جائے گی جو براہ راست ویکسینیشن سینٹرز آئیں گے۔
ضلع گوتم بودھ نگر کے نوئیڈا میں اب تک 17 لاکھ 53 ہزار افراد کو ویکسین دی جا چکی ہے۔ اس میں ویکسین کی پہلی خوراک 14 لاکھ 17 ہزار لوگوں کو دی گئی ہے اور دوسری خوراک 3 لاکھ 36 ہزار لوگ سیکنڈ ڈوز لے چکے ہیں۔
