ریاست اترپردیش کے سہارنپور میں کانگریس کے رہنما اور سابق رکن اسمبلی عمران مسعود نے آج حکومت کی جانب سے نوکریوں کے لئے بنائے گئے قانون کی مخالفت کرتے ہوئے کہا کہ 'یہ قانون نہیں تعلیم یافتہ نوجوانوں پر حملہ ہے۔
انہوں نے کہا کہ اس قانون کے تحت پانچ سال تک نوجوان کانٹریکٹ پر کام کریں گے اور انہیں ہر ماہ آگے کام کرنے کے لئے رشوت دینی پڑے گی، یہ سراسر تعلیم یافتہ نوجوانوں کے ساتھ دھوکہ ہے۔
عمران مسعود نے کہا کہ 'ملک میں بے روزگاری عروج پر ہے اور حکومت برابر جھوٹ بولنے کا کام کررہی ہے، موجودہ حکومت نے نوجوانوں کو جو خواب دکھائے تھے وہ سب کھوکھلا ثابت ہورہے ہیں۔
عمران مسعود نے یہ بھی کہا کہ 'وزیر اعظم کی یوم پیدائش کے موقع پر کانگریس کارکنان ”بے روزگار دیوس“ کے طور پر منائے گی، تاکہ ان کو یاد دلایا جا سکے کہ انہوں نے انتخاب سے قبل دو کروڑ نوجوانوں کو روزگار دینے کا وعدہ کیا تھا لیکن لاک ڈاؤن میں ڈھائی کروڑ لوگوں کا روزگار ختم کردیا گیا جو آج پریشان حال ہیں ۔
