بدھ کی صبح اترپردیش کے نوئیڈا میں یمنا ایکسپریس وے پر ہوئے حادثے میں ایک بحریہ کارکن ہلاک اور دو دیگر شدید زخمی ہوگئے۔
ڈپٹی کمشنر پولیس راجیش کمار سنگھ نے بتایا کہ نیول یونٹ این سی سی ٹی/ 5 ، پریاگراج میں تعینات کلدیپ، دھننجے سنگھ اور ستیش چندر گنگوار ، صبح چار بجے کے قریب کار میں یمنا ایکسپریس وے کے راستے پریاگراج(الہ آباد) سے دہلی جارہے تھے۔ ربو پورہ کے علاقے میں ان کی کار کو کسی نامعلوم گاڑی نے ٹکر ماردی۔ کار میں سوار تینوں افراد اس حادثے میں شدید زخمی ہوگئے۔
مذکورہ پولیس افسر نے بتایا کہ زخمیوں کو جیور کے کیلاش ہسپتال میں داخل کرایا گیا، جہاں ڈاکٹرز نے ستیش چندر گنگوار کو مردہ قرار دے دیا۔ اور دو افراد کی حالت تشویشناک بتائی جاتی ہے۔ انہوں نے بتایا کہ پولیس نے لاش کو پوسٹ مارٹم کے لئے بھیج دیا ہے اور پریاگراج کے نیول یونٹ کو حادثے کی اطلاع دی گئی ہے۔
