علیگڑھ مسلم یونیورسٹی (اے ایم یو) میں آج صبح شعبہ فزیکل ہیلتھ ایجوکیشن کی جانب سے یونیورسٹی ایتھلیٹ گراؤنڈ پر قومی یوم کھیل کے موقع پر پروقار تقریبات کا انعقاد کیا گیا۔
صبح 7 بجے پروگرام کا آغاز ہوا اس موقع پر مارچ پاسٹ، یوگا سیشن، زومبہ ڈانس اور ایتھلیٹک گراؤنڈ پر اسمبلی کے ساتھ ہی 'فٹ انڈیا موومنٹ' کے تحت اے ایم یو ایتھلیٹ گراؤنڈ سے ڈی ایم رہائش تک پیدل مارچ کیا گیا۔
اس مارچ میں علیگڑھ مسلم یونیورسٹی کے اسکولی، اے بی کے یونین بوائز، اے بی کے یونین گرلز، ایس ٹی ہائی اسکول، عبداللہ ہائی سکول، سٹی گرلز ہائی سکول، سینئر سیکنڈری بوائز، سینئر سیکنڈری گرلز اور احمدی بلائنڈ اسکول کے تقریبا 2 ہزار سے زیادہ طلبہ وطالبات اور اساتذہ نے بڑھ چڑھ کر حصہ لیا۔
یونیورسٹی ایتھلیٹک گراؤنڈ سے ڈی ایم رہائش تک پیدل مارچ کے دوران سبھی حفاظتی اور ضروری انتظامات کیے گئے جس میں ٹریفک پولیس، رضاکار، ایمبولینس شامل رہے۔
قومی یوم کھیل پر یونیورسٹی اسکول کے طلبہ و طالبات کے ساتھ اساتذہ اور یونیورسٹی انتظامیہ سے رجسٹرار عبدالحمید، پرووائس چانسلر پروفیسر اختر حسیب، شعبہ فزیکل ہیلتھ ایجوکیشن کے سربراہ پروفیسر ضمیر اللہ خان، اسسٹنٹ پروفیسر ارشد باری، اے ایم یو اسکول کے سبھی پرنسپل موجود رہے۔
یونیورسٹی رجسٹرار عبدالحمید نے بتایا کہ وزیراعظم نریندرمودی نے فٹ انڈیا موومنٹ کے تحت پورے ملک میں مہم چلائی ہوئی ہے اسی کے مدنظر آج علیگڑھ مسلم یونیورسٹی میں قومی یوم کھیل منایا جا رہا ہے جس میں یونیورسٹی کے شعبہ فزیکل ایجوکیشن کے ساتھ تمام اسکول کے طلبہ طالبات اور اساتذہ نے بڑھ چڑھ حصہ لیا۔
