علی گڑھ: ریاست اترپردیش کے علی گڑھ ضلع میں واقع ذاکر حسین کالج آف انجینئرنگ اینڈ ٹکنالوجی، علی گڑھ مسلم یونیورسٹی (اے ایم یو) کے شعبہ آرکیٹیکچر نے اسلامی فن تعمیر کے ورثہ پر ایک قومی کانفرنس کا انعقاد کیا۔ اسلامی فن تعمیر کے ورثہ پر قومی کانفرنس کے افتتاحی اجلاس میں اپنے صدارتی کلمات میں اے ایم یو وائس چانسلر پروفیسر طارق منصور نے دنیا کے مختلف خطوں جیسے مشرق وسطیٰ، ترکی، یوروپ، قطر اور اسپین میں اسلامی فن تعمیر کی خصوصیات کا ذکر کیا۔ سری نگر میں پری محل گارڈن پیلیس کے خصوصی ذکر کے ساتھ انہوں نے ہندوستان میں اسلامی فن تعمیر میں دارا شکوہ کے تعاون پر بھی روشنی ڈالی۔
مہمانانِ اعزازی، پروفیسر ایس ایم اختر، سابق ڈین، فیکلٹی آف آرکیٹیکچر، جامعہ ملیہ اسلامیہ اور پروفیسر جگبیر سنگھ، ڈائرکٹر، ایمیٹی اسکول آف آرکیٹیکچر نے ایک دلچسپ موضوع پر کانفرنس کے انعقاد کے لئے شعبہ کو مبارکباد پیش کی۔ ڈین فیکلٹی آف انجینئرنگ اینڈٹکنالوجی پروفیسر محمد التمش صدیقی نے بھی فیکلٹی کی حصولیابیوں کے حوالے سے اپنے خیالات کا اظہار کیا۔ پروفیسر محمد خالد حسن نے دنیا کے مختلف حصوں میں موجود اسلامی فن تعمیر کی خصوصیات، اس کی مختلف شکلوں اور تکنیک کو سمجھنے کے لئے منظم، سائنسی طریقہ کار پر گفتگو اور معلومات کے تبادلے کے لئے کانفرنس کے موضوع کی وضاحت کی۔
پروگرام کنوینر پروفیسر شرمین خان نے موضوع کے مختلف پہلوؤں کا احاطہ کرتے ہوئے اسلامی فن تعمیر کی باریکیوں پر گفتگو کی۔کانفرنس کے تکنیکی سیشن کے دوران اسلامی یا مسلم فن تعمیر، اسلامی فن تعمیر اور پائیداری، اسلامی فن تعمیر کے اصول و عناصر، عصری اسلامی فن تعمیر اور اسلامی فن تعمیر میں تعمیراتی تکنیک سمیت متعدد موضوعات پر تبادلہ خیال کیا گیا اور شرکاء نے اپنے مقالوں کی تلخیص پیش کی۔
یہ بھی پڑھیں:K A Nazami Cnetre For Quranic Studies قرآن پر عمل کرنے کے لئے ترجمہ کے ساتھ پڑھنا ضروری
اختتامی تقریب میں این آئی آر ایف رینکنگ کمیٹی کے چیئرمین پروفیسر مرزا سلیم بیگ بطور مہمان خصوصی اور پروفیسر آئی ایچ فاروقی، چیئرمین شعبہ سول انجینئرنگ بطور مہمان اعزازی شریک ہوئے۔ریسرچ اسکالر اور طلباء کے زمرہ میں بیسٹ پیپر اور بیسٹ پیپر پریزنٹیشن کے ایوارڈ دیئے گئے۔اس موقع پر کانفرنس کی روئیداد (proceedings) کا اجراء بھی عمل میں آیا جس میں 50 تلخصیات (Publications) شائع کی گئی ہیں۔
