ریاست اترپردیش میں بہرائچ کے جمعیۃ علماء ہند کے ضلع صدر اور جامعہ مسعودیہ نورالعلوم بہرائچ کے مہتمم مولانا قاری زبیر احمد قاسمی نے لاک ڈاؤن کی وجہ سے عید کو اپنے گھروں میں منانے کی اپیل کرتے ہوئے اس موقع سے خرید وفروخت نہ کرنے اور انھیں پیسوں سے غریبوں کی مدد کرنے کی باے کہی ہے۔
قاری زبیر احمد قاسمی نے کہا کہ 'کورونا کی وجہ سے ملک میں جو حالات ہیں۔ وہ ہم سب کی نگاہوں سے پوشیدہ نہیں ہے، عالمی پیمانے پر اس وبا کا قہر جاری ہے ، تمام حکومتیں پریشان ہیں لیکن ابھی تک اس کا کوئی مؤثر علاج سامنے نہیں آیا ہے۔
ملک میں لاک ڈاؤن کی وجہ سے کاروبار بند ہیں، مزدوروں بحران کے شکار ہیں۔ اس دوران ابھی تک جو ہم نے قربانیاں دیں ہیں، اس میں جمعہ کی قربانی پنج وقتہ نماز کی قربانی شامل ہے، اس لئے میری آپ سبھی سے گزارش ہے کہ آپ اس سال عید اپنے پرانے کپڑوں میں ہی منائیں، کسی قسم کی خریداری قطعی نہ کریں، آپ اپنے گھروں کے بچوں اور دوسرے افراد کے دلوں میں یہ بات بیٹھا دیں کہ ہم کو اپنے نئے کپڑے نئے جوتے اور دیگر ضروریات کی قربانیاں دے کر اپنے غریب بھائیوں کی مدد کرنی ہے، اپنے پاس پڑوس میں جتنے بھی غریب بھائی ہیں ان کے لئے عید کا سامان فراہم کرنا ہے اور یہ عید حکومت کی جانب سے لاک ڈاؤن کی گائیڈ لائن پر عمل کرتے ہوئے بہت ہی سادگی کے ساتھ منانا ہے۔
