ریاست اترپردیش کے ضلع وارانسی کی سرزمین پر واقع درگاہ فاطمان میں اہل بیت اطہار کی یادگار روضہ بنایا گیا ہے اور رجب المرجب کی پہلی نوچندی پر فاطمان میں عوام کا ہجوم ہوتا ہے۔
اس موقع پر بارگاہ فاطمان کی منتظمہ کمیٹی نے دہلی میں ہونے والے تشدد پر خصوصی دعا کا اہتمام کیا اور امن وامان قائم ہونے کی دعائیں کی گئی ہیں۔
کمیٹی کے اہم رکن فرمان علی نے ای ٹی وی بھارت سے بات کرتے ہوئے کہا کہ 'ایک طرف جہاں دارالحکومت دہلی میں ہونے والے تشدد کی زد میں آکر متعدد انسانی جانیں گئی ہیں تو دوسری طرف کروڑوں اربوں کی جائیداد بھی جل کر خاکستر ہو گئی ہیں۔'
انہوں نے کہا کہ جب انسان بے بس ہوتا ہے تو اللہ سے دعاؤں کے سوا کچھ نہیں کر سکتا، یہی وجہ ہے کہ آج وارانسی کے لوگ درگاہ فاطمان میں حاضر ہوئے ہیں اور دہلی میں امن و امان قائم ہونے کی دعائیں مانگ رہے ہیں۔
انہوں نے کہا کہ مذہبی شہر وارانسی سے اس نوعیت کی دعا کی جائے تو امید ہے کہ لوگوں کے دلوں پر بہتر اثرات مرتب ہوں گے اور امن و امان کی فضا قائم ہوگی۔
انہوں نے مزید کہا کہ بھارت کی گنگا جمنی تاریخ رہی ہے اور ہمیشہ سے ہم سبھی مذاہب کے ساتھ مل کر رہے ہیں۔ ہم دہلی کے عوام سے اپیل کرتے ہیں کہ امن وامان کی فضا قائم کرنے میں ایک دوسرے کا تعاون کریں۔
