ریاست اترپردیش کے مرادآباد رامپور روڈ پر ایڈم اینڈ ایوز کانوینٹ اسکول واقع ہے، اس اسکول کو اب 51 سال پورے ہورہے ہیں، اس سلسلہ میں اسکول کے آڈیٹوریم میں ایک سیمینار کا انعقاد عمل میں لایا گیا۔ اس سیمینار میں ایڈم اینڈ ایوز اسکول کی برانچ محلہ پیر زادہ گل شہید اسکول کے بچوں نے شرکت کی، اس کے ساتھ ہی شہر کے تقریباً آدھے درجن سے زیادہ اسکول کے بچوں نے بھی اس سیمینار میں شرکت کرتے ہوئے بچوں کی حوصلہ افزائی کی۔
اسکول کے 51 سال پورے ہونے پر اس سیمینار کے ذریعہ بچوں کو بتایا گیا کہ ہمیں آگے چل کر کیا کرنا چاہیے۔ پروگرام میں پہنچے آئی ایف ٹی ایم یونیورسٹی کے اسسٹنٹ پروفیسر کمار مَنو نے بچوں کو بتایا کہ جن بچوں کو اپنے کیریئر کے بارے میں اگر فیصلہ کرنا ہے تو وہ صحیح وقت پر ڈسیزن لیں جس سے آپ یہ طے کر سکیں گے کہ آپ کو آئندہ کیا کرنا ہے اور کیا نہیں کرنا ہے۔
مہمان خصوصی نے والدین کو بھی ہدایت کرتے ہوئے کہا کہ بچوں کی من مرضی کے مطابق ہی اسکول میں ان کو سبجیکٹ دلائے جائیں، زبردستی کسی بھی بچے پر بوجھ نہ ڈالیں اگر بچے کو آئی ٹی کرنے میں دلچسپی ہے تو اسے آئی ٹی آئی کرنے دیں اور جسے پولی ٹیکنک کرنی ہے اسے پولی ٹیکنک کرنے دیں۔
پروگرام کے آخر میں اسکول کے چیئرمین مطیع الرحمٰن اور پرنسپل ڈاکٹر عظمت علی خان کے ہاتھوں ان تمام ہو نہار بچوں کو حوصلہ افزائی کے طور پر سرٹیفکیٹس تقسیم کئے گئے۔
