بارہ بنکی: ایک کروڑ روپئے کی مارفین برآمد، 2 ملزمین گرفتار

لکھنو سے متصل بارہ بنکی میں آج پولیس نے منشیات کی اسمگلنگ کے الزام میں دو افراد کو گرفتار کیا ہے۔ پولیس کے مطابق ملزمین کے قبضے سے 912 گرام مارفین برآمد کی گئی ہے۔

اترپردیش کی راجدھانی لکھنو سے متصل بارہ بنکی میں آج پولیس نے دو اسمگلروں کو گرفتار کرنے اور ان کے قبضے سے 912 گرام مارفین برآمد کرنے کا دعوی کیا ہے۔ ضبط کی گئی مارفین کی قیمت عالمی بازار میں ایک کروڑ روپئے بتائی جارہی ہے۔

سپرنٹنڈنٹ آف پولیس جمنا پرساد کے مطابق آج کوتوالی نگرپولیس کو مخبر نے اطلاع کی کہ وبری جنگل کے نزدیک دو لوگ کچھ غیر قانونی سامان لے کر کہیں جارہے ہیں۔

مخبر کی اطلاع پر بتائے گئے مقام پر گھیرا بندی کے دوران دو افراد کو گرفتار کر کے تلاشی لی تو ان کے قبضے سے 912 گرام مارفین برآمد ہوئی ہے۔ پکڑے گئے اسمگلروں کی شناخت محمد رئیس اور مفیض کے طور پر ہوئی ہے۔