اترپردیش پولیس نے تفصیلات فراہم کرتے ہوئے کہا ہے کہ یہ واقعہ نیپال سرحد پر واقع ایک گاؤں میں پیش آیا ہے جو لکھنؤ سے 130 کلو میٹر کی دوری پر ہے۔ جمعرات کے روز یہاں ایک 13 سالہ لڑکی کا ریپ کر کے اسے قتل کر دیا گیا۔
متاثرہ لڑکی کی لاش گنے کے ایک کھیت سے برآمد کی گئی ہے۔ اس معاملے میں پولیس نے دو لوگوں کو گرفتار بھی کیا ہے۔
لڑکی کے والد نے بتایا کہ ان کی بیٹی کا گلا گھونٹ کر قتل کیا گیا، اس کی آنکھیں باہر نکلی ہوئی تھیں اور اس کی زبان بھی کاٹ دی گئی تھی۔
انہوں نے مزید بتایا کہ ان کی بیٹی جمعرات کی صبح 10 بجے رفع حاجت کے لیے گئی ہوئی تھی لیکن جب کافی دیر بعد وہ گھر واپس نہیں آئی تب گھروالوں نے اس کی تلاش شروع کر دی۔
دن بھر تلاش کرنے کے بعد جب وہ پاس کے ایک گنے کے کھیت میں گئے تو وہاں انہیں اپنی بیٹی کی لاش ملی جس کی آنکھیں نکلی ہوئی تھیں اور اس کی زبان بھی کاٹ دی گئی تھی۔ ساتھ ہی اس کے دوپٹے سے گلا گھونٹ کر اس کا قتل کر دیا گیا تھا۔
اس معاملے میں انہوں نے پولیس میں تحریری شکایت درج کرائی ہے اور پولیس نے بھی کیس درج کر لیا ہے اور آگے کی تحقیقات کی جا رہی ہے۔
ضلع ایس پی ستیندر کمار نے بتایا کہ 'پوسٹ مارٹم رپورٹ میں لڑکی کے ساتھ جنسی زیادتی کے واقعے کی تصدیق ہوگئی ہے اور اس کیس میں دونوں ملزمین کو پہلے ہی گرفتار کر لیا گیا تھا'۔
