باغپت میں بھی جنسی زیادتی کا معاملہ، متاثرہ نے زہر کھا لیا

اترپردیش میں جنسی زیادتی کے معاملات پر سے روز بروز پردہ اٹھتا جا رہا ہے، ابھی ہاتھرس اور بلرام پور معاملے پر بحث جاری ہی تھی کہ اب جنسی زیادتی کا ایک اور نیا معاملہ سامنے آیا ہے۔

اترپردیش کے ضلع باغپت میں مبینہ طور پر جنسی زیادتی کے واقعہ اور ملزم لڑکے کی جانب سے جان سے مارنے کی دھمکی ملنے کے بعد نابالغ لڑکی نے 27 ستمبر کو زہر کھالیا اور 30 ستمبر کو اس معاملے میں کیس درج کیا گیا۔

باغپت کے ایس پی ابھیشیک سنگھ نے بتایا کہ ریپ کا واقعہ پیش آنے کے بعد متاثرہ نے زہر کھاکر خودکشی کرنے کی کوشش کی تھی جسے گھر والوں نے فوری طور پر اسپتال داخل کروایا۔

ابھیشیک سنگھ نے مزید بتایا کہ 'متاثرہ لڑکی حالت ابھی بہتر ہے اور اس کا بیان درج کرلیا گیا ہے، ملزم لڑکے کو پولیس نے گرفتار کرکے اس کے خلاف کیس درج کرلیا ہے'۔

ایس پی نے بتایا کہ گزشتہ روز متاثرہ کے والد نے پولیس میں شکایت درج کرائی تھی کہ پڑوس میں رہنے والے وسیم نامی ایک لڑکے نے ان کی بیٹی کے ساتھ جنسی زیادتی کی ہے اور ملزم نے اسے اس معاملہ کا انکشاف کرنے پر متاثرہ کو جان سے مارنے کی دھمکی دی تھی جس سے گھبرا کر نابالغ متاثرہ نے زہر کھاکر خودکشی کرنے کی کوشش کی۔

ملزم کے خلاف دفعہ 376، 504، 506 اور تعزیرات ہند کی دفعہ 3/4 پاسکو ایکٹ کے تحت کیس درج کرلیا گیا ہے اور اس کیس میں آگے کی کارروائی کی جارہی ہے۔