بارہ بنکی: دھان خرید مراکزکا ریاستی وزیر نےجائزہ لیا

ریاست اتر پردیش کے ضلع بارہ بنکی میں محکمہ خوراک اور رسد کے ریاستی وزیر مملکت رنویندر سنگھ نے جمعرات کو معائنہ کیا۔ معائنے کے دوران رنویندر سنگھ کو لاپرواہی، بدنظمی اور بدعنوانی کے معاملے ملے ہیں، تاہم وہ ان معاملات کو میڈیا کے سامنے بتانے سے بچتے رہے، لیکن کسانوں کے درمیان انہوں نے تسلیم کیا ہے کہ دھان خرید مراکز پر بدنظمی کے ساتھ بدعنوانی بھی ہوئی ہے۔

واضح ہو کہ ریاست کے وزیراعلیٰ یوگی آدتیہ ناتھ نے دھان خرید مراکز پر بدعنوانی اور بدنظمی کی خبروں کے بعد مختلف ٹیمیں تشکیل کر کے ان معاملات کی زمینی حقیقت جاننے کے لئے تمام اضلاع میں بھیجا تھا۔

اسی ترتیب میں خوراک اور رسد محکمہ کے ریاستی وزیر مملکت رنویندر سنگھ نے بارہ بنکی کے درجنوں دھان خرید مراکز کا معائنہ کیا۔

معائنے کے دوران انہوں نے کسانوں سے گفتگو کی اور تمام کاغذات دیکھے، جس میں انہیں نہ صرف بدنظمی بلکہ بدعنوانی کے معاملے بھی نظر آئے۔

رنویندر سنگھ نے کہا کہ جو بھی خامیاں ملی ہیں، ان کی جانچ کرا کر ملزمان کے خلاف سخت سے سخت کارروائی کی جائے گی۔