دن کے اجالے میں پٹرول پمپ کے ملازمین سے لاکھوں کی لوٹ

گریٹر نوئیڈا کے علاقے سورج پور اور بیٹا 2 پولیس اسٹیشن کے علاقے میں لوٹ کی دو واردات کو انجام دیا گیا، عینی شاہدین کا کہنا ہے کہ بلٹ پر پولیس کا اسٹیکر لگا تھا اور مڈگارڈ پر گجر لکھا تھا۔

قومی دارالحکومت دہلی سے متصل گریٹر نوئیڈا میں بلیٹ پر سوار دو بدمعاشوں نے پٹرول پمپ کے ملازمین سے آٹھ لاکھ روپے اور بیٹا 2 تھانہ حلقہ میں سینٹرو سوار چار بدمعاشوں نے دو لاکھ روپے لوٹ لیے۔ ان واردات کے بعد پولس کمشنر آلوک سنگھ نے سورج پور کوتوال پردیپ ترپاٹھی کو معطل کر دیا ہے۔

سورج پور کوتوالی علاقے کے دیولا گاؤں کے پٹرول پمپ کے ملازم سپروائزر ارجن اور ڈرائیور انکیت بذریعہ اسکوٹی آٹھ لاکھ روپے ڈگی میں رکھ کر سورج پور کے بینک آف انڈیا میں جمع کرنے جارہے تھے۔ راستے میں قصبے کے پوسٹ آفس کے قریب دو بلٹ سوار بد معاشوں نے اوور ٹیک کر کے ان کی اسکوٹی کو رکوا دی۔

شرپسندوں نے پستول کے زور پر اسکوٹی کی ڈگی میں رکھے آٹھ لاکھ روپے لوٹ لیے، دوسرا واقعہ بیٹا 2 تھانہ علاقے کے سٹی پارک کے قریب پیش آیا، جہاں ڈیلٹا ون پیٹرول پمپ کے دو ملازم ایک موٹر سائیکل سے روپیہ بینک جمع کرنے جارہے تھے۔

جیسے ہی وہ سٹی پارک کے قریب پہنچے سینٹرو پر سوار چار شرپسندوں نے اس کی اسکوٹی میں دو بار ٹکر مار دی، دونوں پٹرول پمپ کارکنان اسکوٹی سمیت سڑک پر گر پڑے، تبھی شرپسندوں نے پستول کے زور پر دو لاکھ روپے ان سے لوٹ لئے۔

دونوں ہی معاملات میں پولیس اطلاع ملنے کے فوری بعد موقع پر پہنچ گئی اور مقدمہ درج کرکے تفتیش شروع کردی۔