Meerut Qazi's Appeal: میرٹھ شہر کے قاضی کی مسلمانوں سے اپیل

بی جے پی کے معطل رہنماؤں کے قابل اعتراض تبصروں کے بعد ملک کو عالمی سطح پر ذلت اور رسوائی کا سامنا کرنا پڑ رہا ہے۔ وہیں دوسری جانب بھارتی مسلمانوں میں بھی ان رہنماؤں کے خلاف زبردست ناراضگی اور غصہ دیکھنے کو مل رہا ہے۔ میرٹھ میں بھی مسلمانوں کی ناراضگی کو دیکھتے ہوئے جمعہ کی نماز کے بعد کہیں بھی کسی طرح کا ناخوش گوار واقعہ نہ پیش آئے، اس کے پیش نظر شہر قاضی میرٹھ نے مسلمانوں سے صبر کرنے کی اپیل کی ہے۔ Meerut Qazi's Appeal to Muslims

میرٹھ: ریاست اترپردیش کے کانپور میں بی جے پی رہنماؤں کے خلاف مسلمانوں میں ناراضگی کم ہونے کا نام نہیں لے رہی ہے۔ مسلمانوں کا ماننا ہے کہ ایسے لوگوں کو پارٹی سے برطرف کر دینا ہی کافی نہیں بلکہ ان کو جلد از جلد گرفتار کر کے سخت سزا دی جانی چاہیے۔ واضح رہے کہ گزشتہ جمعہ کو کانپور کے مسلمانوں نے نماز جمعہ کے بعد احتجاجی مظاہرہ کیا۔ اسی دوران شرپسندوں نے اسے فسادات میں تبدیل کر دیا تھا۔ مسلمانوں کو اسی آزمائش سے بچانے کے لیے میرٹھ کے شہر قاضی نے عوام سے اپیل کرتے ہوئے کہا کہ کل نماز جمعہ کے بعد سبھی لوگ اپنی مساجد میں ایسی احمقانہ حرکات کرنے والوں کے خلاف اپنی ناراضگی کا اظہار کریں لیکن سڑکوں پر کسی قسم کا مظاہرہ نہ کریں۔

اس کے علاوہ شہر قاضی نے نماز جمعہ کے بعد ضلع انتظامیہ کو ان دونوں رہنماؤں کے خلاف ایک میمورنڈم دینے کی بھی بات کہی۔ کانپور میں بی جے پی ترجمان نے جس طرح سے رسول اللہ کی شان میں گستاخی کی ہے، اس سے ملک کی شبیہ کو نقصان پہنچا ہے۔ کسی بھی مذہب کی توہین کرنے والے افراد کے خلاف سخت کارروائی کی جائے تاکہ عوام کے غصے کو کم کیا جا سکے۔