اتر پردیش کے ضلع میرٹھ کے مختلف کوارنٹائن مراکز پر سینکڑوں تبلیغی جماعت کے ارکان گذشتہ ڈیڑھ ماہ سے اپنی رہائی کا انتظار کر رہے ہیں ، میرٹھ کی سردهنہ تحصیل کے جین انٹر کالج کوارنٹائن سینٹر میں 90 میں سے 56 ارکان کو تو 45 دن سے زیادہ کا وقت گزر چکا ہے مگر انکا کوئی پرسان حال نہیں ہے۔
گزشتہ روز ان افراد سے ملاقات کے بعد قاضی سردھنه نے حکومت اور ضلع انتظامیہ سے انہیں ڈسچارج کرنے کی گذارش کی ہے، وہیں جماعت کے ارکان کے ساتھ ہورہے برتاؤ کو لیکر نائب شہر قاضی میرٹھ اور جمیعت علماء ہند شہر میرٹھ کے ذمہ دران نے افسوس ظاہر کرتے ہوئے انہیں ڈسچارج کرنے کا مطالبہ کیا ہے۔
میرٹھ کے سر دھنہ، موانہ اور جئی کے کوارنٹائن سینٹروں میں موجود سینکڑوں ارکین جماعت كو کورنٹائن کی مدّت مکمّل کرنے کے باوجود بھی رہا نہ کیے جانے سے یہ ارکان حکومت اور ضلع انتظامیہ پر غیر جانب دارانہ رویہ برتنے کا الزام لگا رہے ہیں ۔ایسے حالات میں تبلیغی جماعت کے لوگ اب مايوس ہو چکے ہیں کہ شاید ہی عید کے دن ان كو اپنے اہل خانہ کا ساتھ مل سکے۔
