ان رین بسیروں میں صاف صفائی نہ ہونے سے مسافر اور بے سہارا لوگوں کو رات گزارنا مشکل ہو جاتا ہے۔
ریاست اترپردیش کے ضلع میرٹھ میں بھی سردی کے موسم میں غریب بے سہارا لوگوں کے لیے ضلع انتظامیہ کی جانب سے رین بسیرے کا انتظام کیا جاتا ہے۔ میرٹھ میں قائم ایسے ہی رین بسیروں کا جب جائزہ لینے کی کوشش کی گئی تو الگ ہی تصویر دیکھنے کو ملی۔
میرٹھ کے لیڈی ہسپتال میں قائم رین بسیرے میں نہ تو بیڈ پر کوئی چادر تھی اور نہ ہی اوڑھنے کے لیے کوئی لحاف سردی کی سرد راتوں میں الاؤ کا کبھی کوئی انتظام نظر نہیں آیا ۔
ہسپتال کی ڈاکٹر کے مطابق مریض کی تیمار دار کو وہ اپنے یہاں سے ہی چادر کمبل وغیرہ مہیا کراتے ہیں نگر نگم کی جانب سے اس کا کوئی انتظام نہیں کیا گیا ہے وہیں دوسری جانب ان رین بسیرون میں رات گزارنے کے لیے آنے والے افراد گندگی اور پرانے لحاف اور چادر کی صفائی نہ ہونے سے با مشکل وقت گزا رپاتے ہیں۔
غریب اور بے سہارا افراد کو آسرا مہیا کرانے میں حکومت اور ضلع انتظامیہ کا اہم فریضہ ہوتا ہے لیکن میرٹھ میں رین بسیرون کے حالات دیکھ کر ایسا لگتا ہے جیسے نگر نگم اپنی ذمہ داریوں سے منہ موڑ چکا ہے اور صرف خانہ پورتی کے نام پر سہولت فراہم کرنے کی بات کرتا ہے۔
