کانگریس پارٹی کے قومی ترجمان اور راجیہ سبھا کے رکن پی ایل پونیا نے اس معاملے میں مایاوتی کو بی جے پی کا غیراعلانیہ ترجمان قرار دیا۔ انہوں نے کہا کہ مایاوتی صرف بی جے پی کی چاپلوسی کے لیے راجستھان کے سیاسی بحران میں اتر رہی ہیں جبکہ ان کی پارٹی کا اس سے کوئی واسطہ ہی نہیں ہے۔
بارہ بنکی میں اپنی رہائش پر ای ٹی وی بھارت سے بات کرتے ہوئے پی ایل پونیا نے کہا کہ ایک برس قبل راجستھان میں کانگریس حکومت کی تشکیل کے بعد بی ایس پی کے ایم ایل نے کانگریس کی حمایت کی تھی اور کچھ روز بعد انہوں نے کانگریس میں شمولیت اختیار کرلی تھی۔ اس وقت اسپیکر نے بھی اپنی رضامندی ظاہر کی تھی۔
اب جبکہ بی جے پی کی جانب سے ارکان اسمبلی کو خریدنے کے گندے کھیل کے ذریعہ کانگریس کی حکومت کو گرانے کی کوشش کی جارہی ہے تو مایاوتی نے صرف اور صرف بی جے پی کی چاپلوسی کے لیے عدالت میں عرضی داخل کی ہے۔
پونیا نے کہا ایک برس بعد مایاوتی وہپ جاری کرتی ہیں جبکہ بی ایس پی کا اب کوئی بھی ایم ایل اے نہیں ہے۔ انہوں نے کہا کہ مایاوتی اور بی جے پی کے درمیان رشتہ کسی سے چھپا نہیں ہے۔ مایاوتی، بی جے پی کی مدد کرنا چاہتی ہیں۔ انہوں نے مایاوتی پر بی جے پی کی غیراعلانیہ ترجمان کی طرح کام کرنے کا الزام عائد کیا۔
