مرادآباد: اترپردیش کے مرادآباد کے دورے پر آئے اتراکھنڈ حج کمیٹی کے سابق چیئرمین مولانا زاہد رضا رضوی نے ہلدوانی تجاوزات معاملے پر میڈیا سے بات چیت کرتے ہوئے کہا کہ سپریم کورٹ کے ایک فیصلے سے ہزاروں لوگوں کو راحت پہنچی ہے۔ سپریم کورٹ کا فیصلہ قابل تعریف ہے۔ مولانا زاہد رضا رضوی نے کہا کہ مقامی باشندوں سے ان کی بات چیت ہوئی ہے۔ مقامی لوگوں نے سپریم کورٹ کے فیصلے پر خوشی کا اظہار کیا ہے اور عدالت کا شکریہ بھی ادا کیا ہے۔ Maulana Zahid Raza Reaction On Supreme Court Stay Order Over Haldwani Case
ان کا کہنا ہے کہ چند روز قبل ہلدوانی میں رہنے والے لوگ اپنے مستقبل کو لے کر فکر مند تھے۔ لیکن سپریم کورٹ نے ان کی عرضی پر سماعت کرتے ہوئے ان کے حق میں فیصلہ سنایا ہے۔ اللہ نے ان تمام مظلوموں اور بے گناہوں کی دعائیں قبول فرمائیں۔ اتراکھنڈ حج کمیٹی کے سابق چیئرمین نے کہا کہ وہ اس ملک کی سپریم کورٹ کا شکریہ ادا کرتے ہیں۔ اس فیصلے سے سپریم کورٹ کا پیغام پوری دنیا تک پہنچا ہے کہ غریب آدمی کو سپریم کورٹ سے انصاف مل سکتا ہے۔ حالانکہ میڈیا کے کچھ لوگ اس معاملے کو ہندو مسلم کا رنگ دے رہے تھے، ہندو اور مسلمان دونوں کے یہاں مکانات ہیں۔ یہ ہندو مسلم معاملہ نہیں بلکہ انسانیت کا معاملہ ہے۔
مولانا نے مزید کہا کہ سال 2019 میں ہمارے ملک کے وزیر اعظم نریندر مودی نے دہلی کی تقریباً 1700 غیر قانونی کالونیوں کو قانونی حیثیت دینے کے لئے پارلیمنٹ میں ایک بل پاس کرایا۔ ان کی مدد سے دہلی کی تقریباً 1700 غیر قانونی کالونیوں کو قانونی شکل دی گئی تھی۔ مرکزی حکومت کو اس معاملے میں مداخلت کرنے کی ضرورت ہے۔ ہم مرکزی حکومت سے مطالبہ کرتے ہیں کہ دہلی کی طرح ہلدوانی کی ان کالونیوں کو بھی قانونی قرار دیا جانا چاہیے۔ Maulana Zahid Raza Reaction On Supreme Court Stay Order Over Haldwani Case
