مولانا خالد رشید فرنگی محلی نے میڈیا کو بتایا کہ ملک میں کورونا وائرس تیزی سے پھیل رہا ہے اس کے روک تھام کے لیے ہر ممکن کوشش کرنی چاہیے۔ انہوں نے مسلمانوں سے گھروں میں رہنے کی اپیل کی ہے۔
انہوں نے تبلیغی جماعت کو میڈیا کے ذریعہ تنقید کا نشانہ بنانے پر محتاط ردعمل کا اظہار کرتے ہوئے کہا کہ جو بھی مرض میں مبتلا ہیں انہیں فوراً ڈاکٹروں سے رجوع ہونے کی ضرورت ہے۔
واضح رہے کہ مرکزی تبلیغی جماعت نئی دہلی میں گزشتہ دنوں ہوئے ایک پروگرام میں کثیر تعداد میں لوگوں نے شرکت کی تھی، لیکن اچانک لاک ڈاؤن ہونے کی وجہ سے کافی لوگ وہیں پھنس گئے، یہاں پھنسے لوگوں میں کورونا وائس کے کئی کیسز مثبت سامنے آئے۔ اس کے بعد ملک بھر میں الگ بحث شروع ہوگئی ہے۔
مولانا خالد رشید فرنگی محلی نے کہا کہ کورونا وائرس کا علاج یا چیک ایپ نہ کرانے والے وہ اپنے آپ اور اپنے اہل خانہ کو ہلاکت میں ڈال رہے ہیں۔ انہیں چاہیے کہ وہ فوراً ڈاکٹروں سے رجوع کریں ۔انہوں نے کہا کہ بیماروںکو علاج کرانا شرعی فریضہ ہے۔
دارالعلوم فرنگی محلی لکھنؤ کی جانب سے ایک فتویٰ بھی جاری کیا گیا ہے، جس میں بتایا گیا کہ "کورونا وائرس کا علاج کرانا سبھی کے لئے لازمی ہے۔"
مولانا خالد رشید نے بیان جاری کرتے ہوئے کہا کہ جن لوگوں کو کورونا وائرس ہے، ان کے لیے لازمی ہے کہ وہ اپنا میڈیکل چیک اپ کرائیں کیوں کہ یہ شرعی فریضہ ہے اور جو چھپائیں وہ شریعت کے مطابق عمل نہیں کر رہے ہیں۔
انہوں نے کہا کہ جو لوگ جان بوجھ کر اپنا چیک اپ یا علاج نہیں کرا رہے ہیں، وہ اسلامی شریعت کی خلاف ورزی کر رہے ہیں۔ لہذا سبھی کو چاہیے کہ وہ اپنی اور دوسروں کی جان مال بچانے کے لیے علاج ضرور کرائیں۔
