دریائے گھاگھرا کی آبی سطح میں زبردست اضافہ سے ضلع مئو کے سرحدی علاقوں میں سیلاب کی صورتحال پیدا ہو گئی ہے۔ مئو کے مدھوبن تحصیل حلقہ میں درجنوں گاؤں کا تعلق ضلع سے ٹوٹ گیا ہے۔
دریائے گھاگھرا کے پانی کو روکنے کے لئے تعمیر کیا گیا رنگ باندھ دباؤ میں آ کر دیر شب ٹوٹ گیا۔ انتظامیہ اور پولیس کے افسران موقع پر موجود ہیں۔
ایس ڈی ایم مدھوبن کے مطابق تقریباً 32 ہزار کی آبادی سیلاب کی زد میں ہے۔ رنگ باندھ ٹوٹنے کے بعد دریا کا پانی تیزی کے ساتھ آبادی والے علاقوں میں پھیل رہا ہے۔ ہزاروں ایکڑ دھان کی فصل غرقاب ہو گئی ہے۔
انتظامیہ کی ٹیم کے ساتھ مقامی لوگ خود بھی باندھ کی مرمت میں مصروف ہیں۔ پلاسٹک کٹ بنا کر باندھ کو دوبارہ مرمت کرنے کی کوشش کی جارہی ہے۔ رنگ باندھ کے ٹوٹ چکے حصہ کے دوسری جانب سیلاب میں پھنسے لوگ راحت کا انتظار کر رہے ہیں۔
بتا دیں کہ دریائے گھاگھرا میں نصف شب اچانک آبی سطح میں اضافہ کے ساتھ پانی کی اونچی لہریں پیدا ہوئیں۔ لہروں کے زور سے حفاظت کے لئے تعمیر کیا گیا رنگ باندھ اچانک ٹوٹ گیا۔ باندھ کو توڑتے ہوئے دریا کا پانی مدھوبن تحصیل حلقہ کے غزیاپور، گنگا پور، دوباری، موساڈیہہ سمیت ایک درجن سے زائد گاؤں میں داخل ہو گیا۔
