اترپردیش محکمہ سماجی بہبود کے زیر اہتمام نافذ کی جانے والی اس اسکیم کے رجسٹریشن میں اس سال بھی کم درخواست ہی موصول ہو رہی ہیں۔
نومبر کے آخر تک میرٹھ میں منعقد ہونے والی اس اجتماعی شادی تقریب کے لیے اب تک 21 جوڑوں نے ہی رجسٹریشن کرایا ہے جبکہ محکمہ کی جانب سے تقریباً 65 جوڑوں کی شادی کرانے کے لیے رقم بھی حکومت جانب سے جاری کی جاچکی ہے۔
سماج کے غریب اور ضرورتمند طبقہ کی مدد کے لیے اتر پردیش حکومت کی جانب سے اسکیمیں تو عمل میں لائی جا رہی ہیں لیکن ان اسکیموں کا مکمّل فائدہ مستحقین تک نہیں پہنچ رہا ہے۔ ایسی ہی ایک اسکیم اجتماعی شادی اسکیم ہے جس میں سرکاری بجٹ ہونے کے باوجود رجسٹریشن میں غیر معمولی کمی درج کی جا رہی ہے اور متعلقہ محکمہ کے ذمہ داران کو مستحق جوڑوں کی تلاش میں کافی پاپڑ بیلنے پڑ رہے ہیں لیکن انہیں امید ہے کہ آنے والے دنوں میں شادی کے جوڑوں كو تلاش کے ساتھ ہی اسكیم کے ہدف كو پورا کر لیا جائے گا۔
وزیراعلیٰ کی جانب سے جاری اس شادی اسكیم میں ابھی صرف 21 رجسڑیشن ہی ہوسکے ہیں۔ ان میں صرف ایک مسلم جوڑے نے رجسٹریشن کرایا ہے جبکہ محکمہ کے افسران کا ماننا ہے کہ اس اسکیم میں گزشتہ برسوں میں مسلم جوڑوں کی تعداد 75 فی صد تک رہی ہے اور اس شادی اسكیم میں مسلم جوڑے بڑی تعداد میں رجسٹریشن بھی کراتے ہیں۔
کسی بھی سرکاری اسکیم کی اہمیت ضرورتمند اور مستحق افراد تک اس اسکیم کا مکمّل فائدہ پہنچنے سے ہوتی ہے لیکن سرکاری امداد کے نام پر مدد کے دکھاوے کی رسم ادائیگی اسکیم کے اصل مقصد کو ختم کر دیتی ہے۔
