لکھنؤ: کانگریس پارٹی کی اقلیتی سیل کے ریاستی صدر شہنواز عالم نے اپنے بیان میں کہا ہے کہ ’’گاندھی جی کا قتل ملک میں پہلا شدت پسندانہ واقعہ تھا جسے آر ایس ایس سے وابستہ شدت پسند نتھو رام گوڈسے نے انجام دیا تھا۔ آج گوڈسے کے پیروکار گاندھی، نہرو، مولانا ابو الکلام آزاد اور امبیڈکر کے ذریعے تیارکردہ آئین ہند کا قتل کر رہے ہیں۔‘‘
انہوں نے مزید کہاکہ ’’راہل گاندھی کی بھارت جوڑو یاترا نے لوگوں کو پر اعتماد کیا ہے کہ کانگریس پارٹی آئین ہند کو کمزور کرنے کی کسی بھی سازش کو کامیاب نہیں ہونے دے گی۔‘‘ عالم نے مزید کہا کہ راہل گاندھی نے کشمیر کے لال چوک پر ترنگا لہرا کر پورے ملک میں نفرت کی سیاست کے خلاف ایک پیغام دیا ہے اس سے یہ بھی واضح ہو گیا ہے کی ملک گاندھی کے راستے پر چلنا چاہتا ہے گاندھی کے قاتلوں کے راستے پر نہیں۔
انہوں نے کہا کہ کانگریس پارٹی کی اقلیتی سیل جلد ہی ہر ضلع میں آئین ہند کے دیباچہ کی کاپی پہنچانے کی بھی مہم چلائے گی۔مہم میں مدارس کے طلباء و طالبات نے بڑھ چڑھ کر حصہ لیا، مدارس کے طلباء نے علامہ اقبال کی نظم سارے جہاں سے اچھا ہندوستاں ہمارا بھی گنگنایا اس کے ساتھ ہی آئین ہند کے تحفظ کا حلف بھی لیا۔
یہ بھی پڑھیں: Constitution Day آر ایس ایس اور ہندو مہاسبھا آئین کے خلاف تھے، جے رام رمیش
