حکومت نے اسکول مدرسہ کھولنے کی اجازت دے دی ہے۔ لیکن تعلیمی اداروں میں چھائی خاموشی نے ثابت کر دیا ہے کہ لوگوں کے ذہن سے ابھی بھی کورونا کا خوف کم نہیں ہوا ہے۔
بریلی میں درگاہ اعلیٰ حضرت کے زیر اہتمام چلنے والے مدرسہ منظرِ اسلام میں ابھی تک طلباء کی تعداد بہت کم نظر آ رہی ہے۔
سُنّی بریلوی مسلک کا مرکز کہی جانے والی درگاہ اعلیٰ حضرت کے زیر اہتمام چلنے والے مدرسہ منظرِ اسلام میں درس و تدریس کا سلسلہ شروع ہو گیا ہے۔ اساتذہ بھی اپنی سو فیصد حاضری درج کرا رہے ہیں۔ لیکن ابھی تک طلبہ نے مدرسے میں تعلیم حاصل کرنے کا رخ نہیں کیا ہے۔
گزشتہ 19 اکتوبر سے تمام مدرسے کھول دیئے گئے ہیں، لیکن ابھی تک طلبہ کی غیر حاضری کی وجہ سے قائم ہوئی خاموشی ٹوٹنے کا نام نہیں لے رہی ہے۔
مدرسہ منظر اسلام اور مظہر اسلام میں حفاظت اور سہولت کے تمام دعوے کیئے گئے ہیں۔ مدرسہ انتظامیہ نے ہاتھوں کو دھونے اور ماسک کے استعمال کو لازمی طور پر نافذ کیا ہے۔ اسکے بغیر مدرسہ میں داخل ہونے پر پابندی لگائی گئی ہے۔ ابھی ابتدائی طور پر روزانہ مدرسہ آنے والے طلباء کو ہی داخلہ دیا گیا ہے۔
بریلی سے باہر کے طلبہ کو ابھی مدرسے میں آنے کی اجازت نہیں ہے۔ دیگر ممالک کے طلبہ کے لیے ابھی تک ہاسٹل نہیں کھولا گیا ہے۔
مدارس میں شعبان المعظم میں سالانہ امتحان منعقد کیے جاتے ہیں اور اسی مہینے میں نتیجوں کا بھی اعلان کیا جاتا ہے۔ رَمَضَان المبارک کے پورے مہینے میں مدارس کی مکمل طور پر چھٹی ہوتی ہے۔
شوال المکرم میں نیا سیشن شروع ہو جاتا ہے۔ اس مرتبہ جب نیا سیشن شروع ہونا تھا، تب اُن دنوں ملک میں کورونا وائرس کی وجہ سے لاک ڈاؤن نافذ تھا۔ کسی کو گھر سے باہر نکلنے کی اجازت نہیں تھی۔
لہذا طلبہ نے اپنے محدود وسائل سے جتنا ممکن ہوسکا تعلیم حاصل کی۔ اب مدرسہ انتظامیہ طلبہ کو واپس بلارہا ہے۔
