لکھنو :خدمت خلق ہمارا فرض

ملک بھر میں لاک ڈاؤن نافذ ہونے کے بعد سے ہی مہاجر مزدور اپنے آبائی وطن کے لیے پیدل، سائیکل اور اب بسوں کے ذریعے جارہے ہیں۔ ایسے میں ان کے کھانے پینے کے لیےسماجی تنظیمیں اور سماجی کارکنان ان مزدوروں کی امداد کے لئےآگے آرہے ہیں۔

اترپردیش کی دارالحکومت لکھنؤ کے خواجہ معین الدین چستی بھاشا یونیورسٹی کے زیراہتمام مہاجر مزدوروں کے لیے کھانے پینے کا انتظام کیا گیا تاکہ لوگ با آسانی اپنے مقام تک پہنچ سکیں۔

بات چیت کے دوران یونیورسٹی کے وائس چانسلر پروفیسر ماہ رخ مرزا نے بتایا کہ ہم لوگ الوداع جمعہ سے ہی مہاجر مزدوروں کے لیے کھانا پینے کا بندوبست کر رہے ہیں۔

انہوں نے کہا کہ حضرت خواجہ معین الدین چشتی اجمیری رحمۃ اللہ علیہ کے نام پر یونیورسٹی کا نام ہے۔ لہٰذا انہیں کے بتائے ہوئے راستے پر چل کر ہم لوگوں کی مدد کر رہے ہیں۔واضح رہے کہ مزدور پہلے پیدل اور سائیکل سے سفر کرنے پر مجبور تھے ۔لیکن اب حکومت کی جانب سے ان کے لیے بسوں کا انتظام کیا گیا ہے۔شہر کے مختلف چوراہوں پر لوگ ان مزدوروں کے لیے کھانے پانی کا انتظام کرتے ہیں تاکہ انہیں کوئی پریشانی نہ ہو اور باحفاظت اپنے گھروں کو پہنچ سکیں۔