میرٹھ میں وکیل اوم کار کے خودکشی معاملے میں ملزمین کی گرفتاری نہ ہونے سے ناراض مغربی اتر پردیش کے تمام اضلاع میں آج وکیلوں نے کچہری کے دروازوں پر تالابندی کر اپنی ناراضگی کا اظہار کرتے ہوئے پر زور احتجاجی مظاہرہ کیا۔
آج مغربی اتر پردیش کے تمام اضلاع کے ساتھ میرٹھ بار ایسو سیشن کے ذمہ داران نے 12 فروری کو وکیل اوم کار خودکشی معاملے کے ملزمین کی گرفتاری نہ ہونے سے ناراض کچہری کے دروازوں پر تالا لگا کر حکومت اور پولیس کی کارکردگی کے خلاف احتجاجی مظاہرہ کیا۔ان کا کہنا تھا کہ جب تک ملزمین کی گرفتاری نہیں ہوگی ان کا احتجاج جاری رہے گا۔ان کا الزام ہے کہ اقتدار حکومت کے اراکین اسمبلی کو بچانے کے لیے پولیس کوئی قدم نہیں اٹھا رہی ہے۔
وکلاء کا الزام ہے کہ میرٹھ پولیس ملزم بی جے پی کے رکن اسمبلی دنیش کھٹیک کے دباؤ میں کام کر رہی ہے، انہوں نے حکومت کو آگاہ کرتے ہوئے کہا کہ انصاف کی لڑائی لڑنے والوں کو بھی جب انصاف نہیں ملے گا تو عام آدمی کے ساتھ یہ حکومت کس طرح کا برتاؤ کرتی ہوگی۔
واضح رہے کہ وکیل اوم کار خودکشی معاملے کو 22 دن کا وقفہ گزر چکا ہے، لیکن پولیس نے اب تک اس معاملے میں کوئی گرفتاری نہیں کی ہے۔
