ریاست اترپردیش کے ضلع گوتم بدھ نگر میں کسان ایکتا سنگھ گوتم بودھ نگر نے سٹی مجسٹریٹ کے دفتر کا گھیراؤ کرتے ہوئے پٹرول و ڈیزل کی قیمتوں میں ہوئے بے تحاشہ اضافے ، خریف کی فصلوں کے لئے کم سے کم سپورٹ قیمت میں معمولی اضافے اور گنے کی بروقت ادائیگی نہ کئے جانے کے خلاف احتجاج کیا۔
اس سلسلے میں تنظیم کے عہدیداروں اور کارکنوں نے وزیر اعظم نریندر مودی کے نام سٹی مجسٹریٹ کو میمورنڈم پیش کیا اور اس پر عمل درآمد کا مطالبہ کیا۔ تنظیم کے ریاستی ترجمان للت اوانا اور ضلعی میڈیا انچارج راجندر چوہان نے اس بارے میں معلومات دی۔
واضح رہے کہ ملک میں ڈیزل اور پٹرول کی قیمتوں میں زبردست اور غیر معمولی اضافہ ہوا ہے۔ کئی شہروں میں ایندھن کی قیمتیں 100 روپے کو عبور کر چکی ہیں۔ اسی کے خلاف کسان ایکتا سنگھ نے آج قومی صدر سورن پردھان کی سربراہی میں سٹی مجسٹریٹ کو ایک میمورنڈم دیا
کسان ایکتا سنگھ کا کہنا ہے کہ مرکزی حکومت نے خریف کی فصلوں کے لئے کم سے کم امدادی قیمت میں جزوی طور پر اضافہ کیا ہے۔ حکومت ہند نے دھان کی امدادی قیمت میں صرف 72 پیسے فی کلو اضافہ کیا ہے۔ ساتھ ہی وقت پر گنے کی فصل کی عدم ادائیگی کے سبب کسان دکھی اور ناراض ہیں۔
تنظیم نے مطالبہ کیا ہے کہ ڈیزل کی قیمت کو زیادہ سے زیادہ 70 روپے فی لیٹر تک کیا جائے۔ خریف فصلوں کی امدادی قیمت میں بھی اضافہ کیا جائے۔ حکومت کو چاہئے کہ دھان کی قیمت کو کم سے کم 2400 روپے فی کوئنٹل تک بڑھایا جائے۔ نیز گنے کے بقایا جات کو 14 دن کے اندر ادا کیا جائے۔ اگر حکومت تنظیم کے مطالبات پر عمل درآمد نہیں کرے گی تو ہم احتجاج کرنے پر مجبور ہوجائیں گے۔
