ریاست اترپردیش کے ضلع سہارنپور میں فلائی اوور اور ہائی وے کا کام گذشتہ ڈیڑھ برس گذر جانے کے بعد بھی پورا نہ ہونے پر اترپردیش جن کلیان منچ نے ایس ڈی ایم دیوبند کو 6 نکاتی میمورنڈم سونپا۔ اس میمورنڈم میں فلائی اوور پر برساتی پانی کی نکاسی اور ہائی وے پر دونوں جانب بنائے گئے نالے کی صفائی کا کام پورا کرکے فلائی اوور کے نیچے خوبصورتی کرائے جانے کا مطالبہ کیا گیا ہے۔
اترپردیش جن کلیان منچ کے زیر اہتمام منچ کے کارکنان نے احتجاجی مظاہرہ کرتے ہوئے ایس ڈی ایم راکیش کمار کو میمورنڈم سونپا۔ میمورنڈم میں فلائی اوور کے نیچے ناجائز قبضہ ہٹائے جانے، ہائی وے کے دونوں جانب خستہ حال ہو چکی سڑک کو دوبارہ تعمیر کرائے جانے اور ریلنگ کا کام پورا کرا کر اس میں اندر کی جانب پھلواری وغیرہ لگوائے جانے کا مطالبہ کیا گیا ہے۔
میمورنڈم میں کہا گیا ہے کہ فلائی اوور کے اوپر اور نیچے دونوں جانب روشنی کا نظم کرایا جائے۔ سہارنپور اور مظفرنگر کی جانب سے شہر میں داخل ہونے پر بڑا گیٹ بنا کر ان پر الیکٹرونک بورڈ نصب کیے جانے کا مطالبہ کیا گیا۔ جس سے شہر میں آنے والے شخص کو معلوم ہو اور وہ حادثہ سے بچ سکے۔
اس موقع پر چودھری اوم پال سنگھ نے کہا کہ جی ٹی روڈ کی تعمیر میں کمپنی نے بے ضابطگیاں کی ہوئی ہیں۔ سروس روڈ کو بھی ابھی تک پورا نہیں کیا گیا ہے۔ روز حادثات ہو رہے ہیں۔ متعدد مرتبہ انتظامیہ اور کمپنی کے افسران کو اس سلسلے میں آگاہ کیا جاچکا ہے مگر وہ اس طرف کوئی توجہ نہیں دے رہے ہیں۔
انہو ں نے کہا کہ اگر اب بھی انتظامیہ اور کمپنی نے ہمارے مطالبات پر غور نہیں کیا تو آگے پالیسی بناکر تحریک چلائی جائے گی اور اس کی پوری ذمہ داری انتظامیہ اور کمپنی کے افسران کی ہوگی۔
