قومی دارالحکومت دہلی میں واقع جامعہ ملیہ اسلامیہ یونیورسٹی (جے ایم آئی) کو ماسکو میں قائم راؤنڈ یونیورسٹی رینکنگ (آر یو آر) 2020 کے ذریعہ دنیا بھر کی یونیورسٹیز کی درجہ بندی میں 538 مقام پر رکھا گیا ہے۔
گذشتہ برسوں کے مقابلے جامعہ کی یہ لمبی چھلانگ ہے جس نے گذشتہ برس کی شماریات 631 کے مقابلہ کافی بہتری لائی ہے.
جامعہ کو یہ درجہ دنیا بھر کی تقریباً 1100 یونیورسٹیز میں سے دیا گیا ہے۔
بھارتی سطح پر یونیورسٹی کو 10 ویں پوزیشن پر رکھا گیا ہے جو گذشتہ برس کے 11ویں تھی۔
یونیورسٹی سرگرمیوں کے چار اہم شعبوں میں سے جامعہ ملیہ اسلامیہ کو درس و تدریس میں زیادہ نمبر ملا۔
یونیورسٹی کو درس، تحقیق، بین الاقوامی تنوع اور مالی استحکام میں بالترتیب 186، 684، 794 اور 677 پوزیشن ملی ہے۔
جامعہ کی اس پیش رفت اور کامیابی پر شیخ الجامعہ پروفیسر نجمہ اختر نے خوشی کا اظہار کرتے ہوئے اس کا سہرا تدریسی عملہ کو دیا اور کہا کہ یہ ہمارے اساتذہ کی کوشش، تحقیق اور تعلیمی کاموں میں ان کی انتھک جدو جہد سے ہی ممکن ہوسکا ہے۔
انھوں نے کہا اساتذہ کسی بھی تعلیمی ادارے میں ریڑھ کی ہڈی کی طرح ہوتے ہیں، ان کے تعاون کے بغیر کوئی بھی تعلیمی ادارہ نہیں چل سکتا، آج سب کے سب مبارکباد کے مستحق ہیں، مستقبل میں ان سے مزید محنت کی توقع ہے تاکہ یونیورسٹی مزید ترقی کرے اور نام روشن ہو۔
آر یو آر ورلڈ یونیورسٹی رینکنگ سنہ 2010 سے لے کر اب تک دنیا بھر کی اعلیٰ تعلیم کے اداروں کا جائزہ لے رہی ہے۔
دس برسوں میں، 85 ممالک کی 1100 دنیا کی معروف یونیورسٹیز نے آر یو آر درجہ بندی میں حصہ لیا۔
آر یو آر اپنے درجہ بندی میں یونیورسٹیز کی 20 اہم کارکردگی کا جائزہ لیتی ہے جس میں چار اہم شعبوں تدریس، تحقیق، عالم کاری اور مالی استحکام کا جائزہ لیا جاتا ہے۔
آر یو آر درجہ بندی عالمی سطح پر اعلیٰ تعلیم سے متعلقہ معلومات فراہم کرنے کے لیے ڈیزائن کیا گیا ہے، جس میں طلبا، تعلیمی برادری، یونیورسٹی مینجمنٹ، پالیسی سازی وغیرہ کا جائزہ لیا جاتا ہے۔
آر یو آر نے کووڈ -19 کے درمیان رینکنگ جاری کرتے ہوئے کہا 'ہم سبھی عالمی وبائی مرض سے جوجھ رہے ہیں اور پوری دنیا میں ایک بحران کی سی صورت ہے، اگرچہ پوری دنیا کی یونیورسٹیز آن لائن کام کررہی ہیں، ایسے میں ہمیں یقین ہے کہ اس مشترکہ چیلنج سے سبھی کو تعلیمی شعبے کو اور بھی زیادہ مربوط اور منظم کرنے میں مدد ملے گی'۔
