ریاست اترپردیش کے ضلع بریلی میں آل انڈیا اتّحاد ملّت کونسل کے قومی صدر مولانا توقیر رضا خاں نے شہریت ترمیمی قانون اور قومی رجسٹر برائے شہریت کے خلاف جیل بھرو مہم چلانے کا اعلان کیا تھا، جس کے تحت 3 جنوری سے شہر کی نومحلہ مسجد سے چلکر ضلع کلیکٹریٹ پہنچ کر مختلف مذاہب سے تعلق رکھنے والے 786 شہری گرفتاری دیں گے۔
تاہم مولانا توقیر رضا خاں نے دعویٰ کرتے ہوئے کہا کہ میرے پاس ایسی اطلاعات ہیں کہ شہر سے لیکر دیہی علاقوں سے کثیر تعداد میں لوگ آئیں گے اور کچھ غیر سماجی عناصر ہماری گرفتاری مہم کو فرقہ وارانہ رنگ دینے کی کوشش کر سکتے ہیں۔ لہذا 3 جنوری کو ہونے والی گرفتاری مہم کو ملتوی کیا جاتا ہے اور یہ گرفتاری کوئی دیگر تاریخ اور دن طے کیے جانے کے بعد دی جائےگی۔
واضح رہے کہ بھارتی جنتا پارٹی کی جانب سے آئندہ 5 جنوری کو بریلی کالج میں شہریت ترمیمی قانون اور قومی رجسٹر برائے شہریت کی حمایت میں پروگرام تجویز کیا گیا تھا۔ ضلع انتظامیہ نے بی جے پی کو پروگرام منعقد کرنے کی اجازت نہیں دی اور انکی درخواست کو مسترد کر دیا۔
