وارانسی: محکمہ انکم ٹیکس کی ٹیم جو جمعرات سے سماج وادی پارٹی لیڈر ابو اعظمی کی جائیدادوں کی جانچ کر رہی تھی، ہفتہ کو لکھنؤ کے لیے روانہ ہوگئی۔ اس سلسلے میں آئی ٹی ٹیم نے ابو اعظمی کے قریبی ونائک گروپ کے دستاویز کی چھان بین کی۔ کمپنی کے بینک اکاؤنٹس کی بھی جانچ کی گئی۔ یہ معاملہ 50 کروڑ روپے کے لین دین سے متعلق بتایا جا رہا ہے اور اس ضمن میں تفتیش جاری ہے۔
پچاس گھنٹے سے زیادہ کی تفتیش: ابو اعظمی کی جائیدادوں کی چھان بین کے لیے آئی ٹی ٹیم ممبئی اور لکھنؤ میں چھاپوں کے بعد جمعرات کو وارانسی پہنچی۔ ونائک گروپ کے دستاویز کی 50 گھنٹے سے زیادہ جانچ کی گئی۔ جمعہ کو ٹیم نے گروپ آفس پہنچ کر فائلوں کی جانچ کی جبکہ بینک کھاتوں کی بھی جانچ پڑتال کی گئی۔
100 سے زیادہ فائلیں ضبط: محکمہ انکم ٹیکس کی ٹیم نے ونائک گروپ کے دفاتر سے 100 سے زیادہ فائلیں ضبط کی ہیں۔ اس دوران کئی لین دین سوالوں کی زد میں آئے جن کے بارے میں ٹیم تحقیقات کر رہی ہے۔ ساتھ ہی بینک کھاتوں کی بھی چھان بین کی جا رہی ہے اور ان کھاتوں کا حساب رکھنے والوں سے بھی پوچھ گچھ کی جا رہی ہے۔
وارانسی میں مختلف مقامات پر جانچ اور انکوائری: لکھنؤ سے ایڈیشنل ڈائریکٹر انکم ٹیکس ڈی پی سنگھ کی قیادت میں ٹیم وارانسی پہنچی اور مختلف مقامات پر جانچ کی۔ مالدہیہ، ورونہ گارڈن اور شہر کے دیگر مقامات پر انکوائری اور چھان بین کی گئی۔ ٹیم نے بے نامی جائیدادوں، سرمایہ کاری، ہوالا کاروبار وغیرہ پر توجہ مرکوز کرتے ہوئے تحقیقات کو آگے بڑھایا۔ گزشتہ جمعہ کو ونائک گروپ کے چیئرمین سے بھی پوچھ گچھ کی گئی تھی۔
40 سے 50 کروڑ روپے کے لین دین کے اکاؤنٹس نہیں ملے: اب تک کی تحقیقات میں 40 سے 50 کروڑ روپے کے حوالا لین دین کا انکشاف ہوا ہے۔ کمپنی اس ٹرانزیکشن کے اکاؤنٹس فراہم کرنے میں اب تک ناکام ہے۔ جمعہ کو اعظم گڑھ سے ابو اعظمی کے کچھ قریبی ساتھیوں کے نام سامنے آئے۔ دوران تفتیش وائٹ کالر اور رئیل اسٹیٹ کے کاروبار کرنے والوں کے نام بھی سامنے آئے ہیں۔ انکم ٹیکس ٹیم نے بلڈرز سے بہت سے دستاویز حاصل کیے ہیں جن میں لین دین اور زمین کی خرید و فروخت کے بینک اسٹیٹمنٹ شامل ہیں۔ ابو اعظمی کے قریبی بلڈرز کی فہرست بھی ملی ہے۔ ان کے خلاف 5 سال میں یہ تیسرا چھاپہ ہے۔
مزید پڑھیں: IT Raid Against Azam Khan اعظم خان کے گھروں پر محکمہ انکم ٹیکس کی چھاپہ ماری سیاسی انتقام
کئی دستاویزات اور الیکٹرانک آلات ضبط کیے گئے: ونائک گروپ نے مالدہیہ، پپلانی کٹرا، سینٹرل جیل روڈ وغیرہ جیسے علاقوں میں رہائشی اور تجارتی کثیر المنزلہ عمارتیں تعمیر کی ہیں۔ اس لیے محکمہ انکم ٹیکس نے مالدہیہ میں واقع ونائک پلازہ، سنٹرل جیل روڈ پر واقع ورونا گارڈن اور شہر کے دیگر کئی علاقوں کی چھان بین کی۔ دستاویزات اور ریکارڈ کے علاوہ افسران نے کمپیوٹر ہارڈ ڈسک، لیپ ٹاپ، بینک اکاؤنٹس، زمین کی خرید و فروخت سے متعلق دستاویزات، بینک لاکر سے متعلق دستاویزات وغیرہ ضبط کرلئے۔ محکمہ انکم ٹیکس اس فرم سے وابستہ ٹیکس ماہرین اور چارٹرڈ اکاؤنٹنٹس سے بھی تفتیش کر سکتا ہے۔
