ایک طرف جہاں لاک ڈاؤن کے بعد معاشی صورتحال انتہائی ابتر ہے، ہر طرف افرا تفری کا ماحول ہے۔ لوگ کرائے کے مکانات چھوڑ رہے ہیں، وہیں بعض کو اپنے مکانات کے حصول کے لئے جدو جہد کرنی پڑ رہی ہے۔
کچھ ایسے ہی معاملے میں خریداروں نے نوئیڈا کے سیکٹر 39 تھانہ کے تحت سیکٹر 96 میں کنسٹرکشن کمپنی سپر ٹیک پر اپنے ملازمین کے ذریعے مار پیٹ کا الزام عائد کیا ہے۔
دلیپ، امیت، سچن، گوتم و دیگر کا کہنا ہے کہ ہمیں 2015 میں ہی فلیٹ مل جانے چاہیے تھے۔ ہم نے تمام واجبات بھی ادا کر دیے لیکن ابھی تک فلیٹ نہیں ملے۔
اسی تناظر میں اپنے فلیٹ کے لئے آج پروجیکٹ ڈائریکٹر وکاس کنسل سے میٹنگ تھی لیکن وہ نہیں ملے۔ جس پر ان لوگوں نے دوسرے ڈائیریکٹر سے ملنے کی خواہش کی لیکن وائس پریزیڈنٹ نشانت نے کہا کہ آج کسی سے بھی نہیں مل سکتے۔ جس پر بحث شروع ہوئی۔
خریداروں کا الزام ہے کہ اس پر نشانت نے اپنے باؤنسر کو اشارہ کردیا، جس کے بعد باؤنسروں نے وہاں موجود بائرس کو لاتوں گھونسوں سے پیٹنا شروع کر دیا۔ جس کے بعد معاملہ پولیس تک جا پہنچا ہے۔
