ہمیر پور میں زہریلا سموسہ کھانے سے بچوں اور خواتین سمیت 32 افراد بیمار

اترپردیش میں ضلع ہمیر پور کے سمیرپور علاقہ میں آج ایک فٹ پاتھ کے ہوٹل سے سموسہ کھانے کے بعد چھ بچوں اور کئی خواتین سمیت 32 لوگ بیمار پڑ گئے، جن میں سے سات کی حالت سنگین بتائی جارہی ہے۔

ہمیر پور پولیس نے اطلاع دی ہے کہ ضلع میں ایک فٹ پاتھ کے ہوٹل سے سموسہ کھانے سے 32 افراد بیمار ہوگئے۔ انہوں نے بتایا کہ سمیر پورعلاقہ کے دیو گاؤں میں اتوار کو سڑک کنارے واقع کلو کے ہوٹل پر سموسہ کھانے کے بعد 32 لوگ بیما ر پڑ گئے۔ تمام کو اسپتال میں داخل کرادیا گیا ہے۔

علاج کررہے ڈاکٹروں نے بتایا کہ بادی النظر میں سموسہ زہریلا ہوسکتا ہے اور اسی وجہ سے کھانے والوں کی حالت بگڑی ہے۔ ان میں بچوں کی حالت بہت زیادہ خراب ہے۔

انہوں نے بتایا کہ ہوٹل مالک کو حراست میں لے لیا گیا ہے۔ فوڈ سیکورٹی ٹیم موقع پر پہنچ گئی ہے اور سموسہ جانچ کے لئے بھیج دیا ہے۔ اس سے پہلے بھی علاقہ میں فوڈ پوائزننگ سے کئی لوگ بیمار ہوچکے ہیں۔