ریاست اترپردیش کے ضلع باغپت کے کھیکڑا پولیس اسٹیشن کے علاقے ونئے پور گاؤں کی مسجد میں بی جے پی کے ضلعی ایگزیکیوٹیو ممبر منوپال بنسل کے ہنومان چالیسہ پڑھنے پر مسجد کے امام کو انکے عہدے سے ہٹا دیا گیا ہے۔ اس معاملہ پر مسلمانوں اور امام نے کیمرے کے سامنے اپنا بیان دینے سے انکار کردیا ہے۔
وہیں دوسری طرف ہنومان چالیسہ پڑھنے والے منوپال بنسل کا کہنا ہے کہ انہوں نے بھائی چارہ بنانے کے لئے امام کی رضامندی سے مسجد میں ہنومان چالیسہ کا پاٹھ کیا تھا۔
خیال رہے کہ ونئے پور گاؤں کی مسجد میں دو دن پہلے ہنومان چالیسہ کا پاٹھ کیا گیا تھا۔ اس معاملے میں ہندو برادری کے لوگوں نے اپنے رد عمل کا اظہار کیا ہے۔ ان کا کہنا ہے کہ گاؤں میں مکمل بھائی چارہ ہے۔ ایسی کوئی بھی چیز نہیں ہے جو گاؤں کا ماحول خراب کرے۔
گاؤں کے سابق پردھان سریش کا کہنا ہے کہ دوسرے گاؤں کا ایک نوجوان ہمارے گاؤں کی مسجد میں آیا اور ہنومان چالیسہ کا پاٹھ کرنے لگا۔ یہ سراسر غلط ہے اور ہمیں اس پر افسوس بھی ہے۔
