ریاست اترپردیش کے ضلع مظفر نگر میں ہیومانٹی ویلفیئر سوسائٹی کی جانب سے کورونا کے ٹیکہ کاری کیمپ کا افتتاح کیا گیا۔ جس میں مقامی لوگوں نے جوش و خروش کے ساتھ حصہ لیا اور کورونا وبا کے پھیلاؤ کو روکنے کے لیے ٹیکہ کاری مہم کا حصہ بنے۔
مظفر نگر کے شہر کوتوالی علاقے کے محلہ لدھا والا میں یہ ٹیکہ کاری کیمپ لگایا گیا۔ اس سوسائٹی کے ذریعے مسلم کالونیوں سمیت دیگر کالونیوں میں کورونا وبا سے بچاؤ کے لیے آگاہی مہم چلائی گئی تھی۔ اس بیداری مہم میں ویکسینیشن کی اہمیت کو بتایا گیا تھا۔ اس سے متاثر ہوکر آج لوگوں نے بڑھ چڑھ کر اس کورونا ٹیکہ کاری مہم میں حصہ لیا۔
اس کیمپ کا افتتاح ڈاکٹر نجم الحسن زیدی سوسائٹی صدر، سماجی کارکنان آصف راہی، شاہنواز خان، صوفیا (پرنسپل عظمت علی خاں کالج) نے کیا۔
کورونا وبا کے اس دور میں ہیومانٹی ویلفیئر سوسائٹی کی ٹیم عوامی خدمات کو انجام دینے کے لیے سرگرم رہی ہے۔ وہیں یہ تنظیم فوڈ راشن کے انتظام سے لے کر ویکسینیشن کے لیے بیداری مہم سمیت متعدد پلیٹ فارم پر عوامی خدمات انجام دے رہی ہے۔
