نوئیڈا: ریاست میں بڑھتے کورونا کے معاملے کو دیکھتے ہوئے انتظامیہ ہسپتالوں میں علاج و معالجہ کو یقینی بنانے کے لئے متعدد اقدامات کر رہی ہے ۔ اس ضمن میں آج محکمہ صحت نے دیگر ہسپتالوں اور اداروں کا جائزہ لیا ۔
تحصیلدار صدر آلوک پرتاپ سنگھ اور ایڈیشنل چیف میڈیکل آفیسر ڈاکٹر بی کے سنگھ نے نمس (نیشنل انسٹیٹیوٹ آف میڈیکل سائنسز) ہسپتال کا مشترکہ طور پر دورہ کیا۔ وہاں زیر علاج مریضوں سے علاج اور انتظامات سے متعلق ضروری معلومات حاصل کی۔
اس دوران نمس میں کوویڈ 19 پروٹوکول کے معیارات کے مطابق علاج کی تصدیق ہوئی جبکہ کیٹرنگ سسٹم بھی درست پایا گیا ۔ پھر بھی ہسپتال انتظامیہ اور عملہ کو سختی سے ہدایت دی گئی کہ ہسپتال میں صفائی کا خاص خیال رکھا جائے اور تمام مریضوں کے بیڈ شیٹ کو باقاعدگی سے تبدیل کیا جائے۔
انہوں نے یہ بھی کہا کہ 'کھانے اور کیٹرنگ کے انتظامات تمام مریضوں کو بروقت مہیا کیے جانے چاہئے اور دوائیں مقررہ وقت پر دستیاب ہونی چاہئے تاکہ کورونا سے متاثرہ تمام مریض تیزی سے صحت یاب ہو کر اپنے گھروں کو واپس لوٹ سکیں۔
