Haj Pilgrim From Aligarh علی گڑھ سے 548 عازمین حج کے لئے روانہ ہوں گے

ضلع علی گڑھ سے حج پر جانے والے عازمین کا کوٹا تقریبا 750 ہے، جس میں کل 548 عازمین حج کے لئے روانہ ہوں گے۔ رواں برس حج پر جانے والے عازمین کی تعداد گزشتہ چاربرسوں میں سب سے زیادہ ہے۔

حج کمیٹی آف انڈیا مختلف ریاستوں اور اضلاع کے لئے ہر سال حج پر روانہ ہونے کے لئے عازمین کے کوٹے کو مقرر کرتی ہے، جس کے مطابق ہی عازمین حج کے لئے روانہ ہوتے ہیں۔ ریاست اترپردیش کے ضلع علی گڑھ میں بھی تقریبا 750 کا کوٹہ دیا گیا تھا۔جس میں سے تقریبا 548 عازمین حج کے لئے روانہ ہوں گے۔

حج ٹرینر محمد شاکر نے بتایا حج کمیٹی آف انڈیا کی جانب سے ہر سال حج فیس میں سے عازمین حج کو ایئر پورٹ پر تقریبا 2100 ریال دستیاب کروائے جاتے تھے، جو حاجیوں کے لئے ایک بڑی سہولت تھی، لیکن اب ایسا نہیں ہے، جس کی وجہ سے عازمین روپئے کی تبدیلی کو لیکر پریشان دیکھائی دے رہے ہیں۔

حج پر روانہ ہونے والے محمد ناصر نے حج پر روانہ ہونے پر اپنے آپ کو خوش نصیب بتایا اور اللہ کا شکر ادا کیا۔ ناصر نے حکومت اور حج کمیٹی آف انڈیا سے امید ظاہر کرتے ہوئے کہا ابھی وقت ہے اور ہر سال کی طرح رواں برس بھی عازمین حج کو ریال فراہم کریں گی۔ ضلع علی گڑھ سے6 خواتین محرم کے بغیر رواں برس حج پر روانہ ہوں گی، حج پر جانے والی خواتین نے حج کمیٹی آف انڈیا کی نئی پالیسی کے تحت 45 سال سے زیادہ عمر کی خواتین کو محرم کے بغیر سفرِ حج پر جانے کی اجازت دی گئی۔